Nongstoiñ, Jylliew 17: Ka surok na ïew Rambrai shaduh Umjaut kaba jngai tang kumba shi kilo mitar tam, ka la sniew sha ba palat u pud bad ka la buh ïa ki nongñiah kali ha ka jingeh kaba jur.
Katei ka surok ka dei kaba ki khynnah skul kiba leit pule ha St John Secondary & Higher Secondary School, kaba da ki spah ngut ki ïaid man la ka sngi. Halor ka jingsniew jong katei ka surok u bah Aiman Pariong sordar ka shnong Khynrin haba ïakren bad u nongthoh khubor, u la ong ba katei ka surok ka dei kaba ki nongleit nongwan na ki thaiñ rimen, kata naduh ki thaiñ Mawdoh, Khynrin, Marok, Mawkhiat, Rynñiaw bad kiwei kiwei ki ïaid man ka sngi bad ki nongñiah kali kamai ki thnum ki ud, hynrei na ka liang u MLA um shym la pynsngew satia.
Shuwa ka elekshon, u MLA u la kular ba lada kin pynjop ïa u, un pynkylla rong iong ïa baroh ki surok ha ka thaiñ hynrei , ka jingkular kam shym la urlong wat haduh mynta ba la jan poi sa kawei ka elekshon.
Lada u MLA um leh ei ei hapoh shi bnai ki paitbah kim banse ban ïa mih bad maramot hi noh ïa ka surok.
