Nongpoh, Naitung 20: U MLA ka Nongpoh u Bah Mayral Born Syiem u la pynthikna ba shen yn sa lah ban weng noh ïaka jingkyrduh um haka thaiñ Nongpoh hadien ba ki shnong ba hap haka Census Town kin sa ioh pdiang ïaka skhim JJM lyngba ka Ministry of Jal Shakti jong ka sorkar pdeng, ban pynpoi um ha man la ki thliew iing, namar kumba long baroh shi katta bun ki shnong ba hap haka Census Town kim ioh ïaka umbam umdih kaba biang namar ba ym lah ban pynrung ïa katei ka skhim.
U la ong ruh ba Nongpoh Combine Water Supply Scheme kaba ka don kam lah shuh ban pyndap ïaka um sha kumba 18 tylli ki shnong ba hap haka thaiñ Nongpoh, kaba don tang kawei ka Treatment Plant (TP) haka shnong Iewmawlong bad lyngba katei ka skhim ba thymmai yn sa lah ban shna biang sa kawei ka Treatment Plant haka shnong Mawdiang um ha kaba katei kaba rim kan pynbiang um haki shnong ba sha kamon jong u surok National Highway bad katei ka TP ba thymmai yn sa yn pynbiang um sha ki shnong ba sha ka diang jong u surok National Highway.
U la ong ruh ba naka liang ka tnad PHE mynta ka dang don haka lynti ban pynbiang ïaki DPR ba yn lah ban pyntreikam noh shen ïa katei ka skhim naka bynta ka jingmyntoi jong ki paidbah, bad u la kyrpad ruh sha ki paidbah ka thaiñ Nongpoh ba kin ïaishah shipor katba dang pynbiang ïaki jingdonkam baroh naka liang jong u kum u MLA un nym shongkli kti ban buddien ïa katei ka skhim ba kan urlong noh shen naka bynta ka jingmyntoi jong ki paidbah haka liang ka umbam umdih.
