Shen yn tei noh ïa ka surok suiñ ba nyngkong na Rilbong ter ter haduh Barik Point

Shillong, Jylliew 08 : Ka sorkar jylla ka la buh thong ba shen kin sa ïoh ban sdang pyntrei noh ïa ka surok suiñ kaba nyngkong eh ha nongbah Shillong kaban tei naduh Rilbong ter ter shaduh Barik Point.
Hab pyntip ïa kane ha ki lad pathai khubor dang shen, u Myntri Rangbah ka Jylla, Conrad K Sangma u la ong, “Mynta ka dang ïaid ka jingpynkhreh ïa ka Detailed Project Report (DPR). Kumta ngi khmih lynti ba ïa ka DPR na bynta kane ka surok suiñ (elevated road) yn pyndep bad phah noh ha kine ki 3-4 bnai ban wan.”
Nangta u ong ruh ba ïa ka jingkhot tender na ka bynta kane ka kam dei ban pyndep noh shwa u Nohprah mynta u snem.
“Kumta, ngi khmih lynti ba ha kane ka Financial Year ngin sa lah ban sdang noh ïa ka kam na bynta kane ka surok suiñ,” bynrap biang u Conrad.
Nalorkata, u Myntri Rangbah u la ïathuh ruh ba ki la dep ruh ban shong ïa ka jingïalang bad ka Defence Ministry la ka long naduh ki ophisar kiba don ha Shillong. “Ki ruh ki la dep ban pynpaw shai hangi ba lada dei na ka bynta ka jingmyntoi jong u paidbah ba bun balang na ka liang ka Defence Ministry ka long kaba kloi ban ai ka jingïatrei lang,”
Shuh shuh u ong ba watla ka Ministry ka don la ki jong ki kyndon ba ki hap ban bud kiba treikam salonsar baroh, hynrei ha kito ki jaka pat kiba lait na ka liang ka Defence Ministry ka la pynpaw shai ba ki long kiba kloi ban ai ka jingïatrei lang.
“Ka la don ka jingïakren kaba dei beit tang ïa kane ka surok kaba naduh Rilbong ter ter haduh Barik ha kaba naduh u GOC bad kiwei ki heh jong ki shipai ki la pynpaw ïa ka jingkmen ban don bynta lang ha kane ka kam ban pynïaid shakhmat. Kumta ngi khmih lynti ban ïoh ïa ka jingïatrei lang khnang ba ka kam kan ïaid shakhmat.”
Dang shen u Myntri Rangbah u la ong ba kine ki surok suiñ kin long ka jingmyntoi kaba khraw bha ïa ka nongbah Shillong ym tang ba ka weng ïa ka dheng kali hynrei kan nang pynitynnad shuh shuh ia ka nongbah Shillong na ka jingdon kine ki surok armala. “Kaba kham kongsan ka long ban don ïa ki surok kiba ki kali ki lah ban ïaid na jrong bad kumjuh ruh na shapoh.”
Lah ban kdew hangne, ba ka surok naduh Rilbong ter ter haduh anjalee pump barim, ki dei ki jaka ba ka dheng kali ka jur bha namar baroh ki kali kiba wan na ki bynta jong ka thain Riwar Pynursla bad ki thain Riwar Sohra kumjuh na baroh kawei ka West Khasi Hills, South West Khasi Hills kumjuh na Eastern West Khasi Hills ki ïaid lang na kane kajuh ka surok.
Ym tang katta, ynda la poi ha ka kadbah Rilbong (Rilbong Point) ka tyngkhuh lang pat bad ki kali kiba wan na ki bynta jong ka Ri Bhoi bad kumta katba nang ïaid shakhmat kat haban da poi sha ki bynta jong ka Civil ka jingbun ki kali ka la nang syrtap shuh shuh arshah.