Shillong, Ïaiong 28: I Nongïalam barim ka Congress Legislature Party (CLP) Kong Ampareen Lyngdoh hynne ka sngi palei ila pyntip ba ki 5 ngut ki MLA kin sa shim rai shen halor ka hukum jong ka Meghalaya Pradesh Congress Committee ban sospon ïa ki haduh 3 snem.
“Ngin sa shim ïa ka rai ha ka por kaba dei. Ngim don eiei pyrshah ïa ki Nongïalam ka COngress. Hynrei haba ki Nongïalam kila khang ïa ka jingkhang, kane kala pynbor ïa ngi ba ngin shim ïala ka jong ka rai ha ka por kaba dei” ong i Kong Ampareen.
Haba pynpaw ba im pat ïoh satia ïa kano kano ka jingthoh halor ka hukum ban sospon, ila ong ba ki 5 ngut ki MLA kim pat don jingmut satia ïa mynta ban leit pyniasoh bad kino kino ki seng saiñ pyrthei.
Hynnin ka sngi Balang, ka Congress kala rai ban sospon haduh 3 snem ïa ki Kong Ampareen bad 4 ngut ki MLA ba kynthup ïa u Bah PT Sawkmie MLA ka Mawlai, Bah Mayralborn Syiem MLA ka Nongpoh, Bah Kimfa S Marbaniang MLA ka Rambrai-Jyrngam bad Bah Mohendro Rapsang MLA ka West Shullong namar ka jingleit kyrshan ïa ka Sorkar MDA ba kyrshan da ka BJP.
I Kong Ampareen i ong ba ki5 ngut ki MLA ki don ka jingsngew ba kila shah sospon naduh u bnai Kyllalyngkot mynta u snem. I la buh jingkylli la ka hukum ban sospon ïa ki bala pynmih ha u Kyllalyngkot ka dei kaba la leh khlem da ïohbor na ka High Command.
“Hato phi mut ban ïathuh ha nga ba ka hukum ba pynmih ha u Kyllalyngkot ka dei kaba la pynmih khlem da ïoh bor, nga mut hato ki dang shu ïoh ïa ka jingmynjur” ila ong.
Halor ka jingbym ai jubab jong ki MLA ïa ak Showcause, i kong Ampareen ila pynshai ba ki 5 ngut ki MLA kim sngew donakm satia ban ai jubab namar “Ngi sngew ba ngi la dep ïakren bun sien, iasyllok bad iatai halor kane ka kam”. Ila pynkynmaw ruh ba ha ka jingïalang ban iasyllok ïa ka jingleit kyrshan ïa ka sorkar MDA, ki MDC bad ki MLA ki don bun paid eh ban kyrshan ïa kane ka jingthmu ban ïa kito kiba pyrshah.
“Lada ka Congress ka dei ka party u paidbah, ngi la dei ban sngap ïa ak sur jong uba bun balang namar ngi la dep ïakren ïa kane ka kam” ila ong.
I Kong Ampareen ila kynnoh ruh ba hadien ba ïoh pdiang ïa ka show cause bad hukum sospon ha u Kyllalyngkot, ka MPCC kala weng shimit shimiet ïa ki President ka Block Congress Committee khlem da iasyllok ïa ki MLA.
Haba kylli, ine i MLA ka East Shillong Constituency ila ong ba ka Congress kala shu shim rai ba noh shiliang tarajur. “Nga dang mut ka jingsospon ka mut ba ym dei ban leh eiei shuh hynrei kumno ki don ba dang shim ïa kiwei pat ki sienjam. Ngam lah satia ban sngewthuh. Ngi khlem leh eiei satia hynrei la i pynban ba ka PCC kala rai ïa shi bun kiei kiei bad kila pynpaw shai ba kim kwah shuh ïa ngi ban iadonlang ha ka party”.
Haba kylli ïa kaei pat ka sienjam ba ki MLA kin shim, i Kong Ampareen ila ong ba khlem pep ba baroh ki MLA kin ïakhun ïa ka elekshon MLA 2023 ban pynneh ïa ka jinglong Nongmihkhmat.
“Khlem pep ngin ïakhun ïa ka elekshon 2023 hynrei kumno ki pyrkhat ba tang namar ba ngin ym ïoh ticket shuh na ka Congress ba ngin sangeh noh ïa ka kam saiñ hima sima kaba ngi la saiñdur la bun bun snem” ila ong.
Ha kajuh ka por, ine i Nongïalam ka CLP ila pynkynmaw ba ki 5 ngut ki MLA kila rai ban kyrshan ïa ka Sorkar MDA halor ki ishu ba kynthup ïa ka jingpynbeit ïa ka jingïakajia khappud. I pyntip ba arngut na ki MLA ka Congress ki dei kiba iadonlang ha ki Regional Committee bala thaw da ka Sorkar MDA kum shibynta ban lah pynbeit noh ïa ka jingïakajia pud.
