Shen yn shim rai ka UDP ba tyrwa siew tulop ka Sorkar ïa ki nongtrei District Council

Shillong, Nailar 27 : Ka United Democratic Party (UDP) shen kan sa shim ïa ka rai halor ka jingtyrwa jong ka sorkar ban siew tulop ïa ki nongtrei jong ki lai tylli ki district council jong ka jylla.
Katkum ka jingïathuh jong u General Secretary ka UDP ba dei ruh u nongïalam ka Liang Pyrshah ha KHADC, Bah Titos W Chyne u la ong ba ka party ka la dep ban kynduh hynin ka sngi bad ka la rai ruh ban ïa thir sani bha halor kane ka jingtyrwa.
Shuh shuh u ong ruh ba ki kwah ban ïoh jingshai bha halor kane ka bynta khamtam naba ki Myntri Sorkar na ka UDP kim shym la donlang ban ïoh ai jingmut ha kaba sdang jong kane ka jingïatai.
U Bah Titos u la ong ruh ba na ka liang ka Parliamentary Party jong ka UDP ha KHADC ka la rai ban kynduh hadien ka 07tarik Nailur ha kaba ïa kane ka ishu kin ïatai bad shim ïa ka rai.