Shillong, Jymmang 8 : Hadien ba ka Aam Aadmi Party (AAP) ka la jop don burom bad ïoh ban synshar ha Punjab ha ka election MLA ba dang shu dep shen, mynta ka la sdang ban phai khmat ban pynïar ïa ka party kylleng sawdong ka ri India. Ki nongïalam kane ka party mynta ki la sdang ban phai sha kane ka thaiñ shatei lam mihngi ban seng nongrim noh ïa ka AAP.
La ïoh jingtip ba ki nongïalam jongka mynta ki la trei shitom bha ban ïoh ïa ki briew kiba khuid ba tbit ki bym pat don jingthoh bria ban seng nongrim ïa ka AAP ha Meghalaya, Assam bad Tripura. Na ka bynta ka jylla Meghalaya la ïoh jingtip ba ki la sdang ban ïa kynduh bad ïa kren bad ki katto katne ki riew pawkhmat ha ka jylla bad shen yn sa seng nongrim noh ïa ka AAP ha kane ka jylla.
La ïoh jingtip ruh ba u nongïalam ba hakhlieh duh ka party u Arvin Kejriwal Myntri Rangbah ka Delhi un sa wan shen sha Guwahati ban seng nongrim ïa ka AAP ha Assam bad lehse u lah ban pynbna ha katei ka juh ka sngi lano un wan ban seng nongrim ïa ka AAP hangne ha Meghalaya ruh.
