Shen yn sdang tih dewiong biang ha ka jylla ïathuh u Myntri Rangbah

Shillong, Nailur 29: U Myntri Rangbah ka jylla u Conrad K Sangma ha ka sngi palei u la ïathuh ba ka jingtih dewïong ha ka jylla kat kum ka juk stad mynta yn sa sdang noh ha kine ki khyndiat por ban wan.
Ha ka jingïakren bad ki lad pathai nkhubor u Myntri Rangbah u la ong ba ki la don bud ngut ki riewshimet kiba la wan shakhmat kiba wan pan ïa ki licence ban sdang ïa ka jingtih dewïong bad u la ong ba mynta ki don kumba 15-18 ngut eiei kiba la ïoh ruh ïa ka licence.
“Ki don katto katne kiba la dep ruh ban aiti ïa ka mining plan jong ki bad ynda kane ka mining plan kaba ki aiti ka la ïoh jingmynjur na ki tnat ba pher bapher yn sa lah ban sdang noh ïa ka jingtih dewïong jong ki” ïathuh u Myntri Rangbah
Kat kum ka jingïathuh jong u la ong ba la pyrshang ban bud ïa ki kyndon kiba la kdew ha ka rai bishar jong ka Supreme Court ha u Naitung jong u snem 2019 na ka liang ka sorkar ka kyrmen ba shen hi yn sa lah ban sdang noh ïa ka jingtih dewïong.
Kumban shu kdew ba ha ka 26 tarik Nailur ka Meghalaya High Court ka la bthah ïa ka sorkar jylla ba kan pynsted ïa ki lad ki lynti ban dup lah ban sdang biang noh ïa ka jingtih dewïong.
“Ki lad ki lynti kiba kham biang na ka liang ka sorkar kan hap shim khnang ban lah ban tih dewïong biang ha ka jylla katkum ka kyndon jong ka MMDR) Act of 1957,” ong ka full bench ba khlieh da u Chief Justice Sanjib Banerjee.
Ka Ïing Bishar ka la bthah ruh ïa ka sorkar ba kan wad ki lad ki lynti ha kaba ïadei bad ka jinglilam ïa u dewïong ba la dep tih uba don kumba 31.26 lak.
“Ha shuwa ban shong bishar biang ka sorkar ka dei ban pynthikna ba ki ki sienjam ban shim ka la dep pynkhreh bad lada long lei kaba lah ka jinglilam la dei ruh ban sdang. ngin sa shong bishar biang ïa kane hadien 3 taiew” ong ka hukum.