Khliehriat, Nailur 28: Ka tnat jong ka rep ka riang, ka ophis jong ka District Agriculture East Jaiñtia Hills District ka pynbna paidbah ba ka tnat Agriculture and Farmers Welfare, Ministry of Agriculture ha ryngkat ka jingïatreilang bad ka tnat ka rep ka riang jong ka jylla Meghalaya, shen kan sa pynlong ïa ka 11th Agriculture Cencus lane ka khana samari jong ki nongrep 2021-2022.
Ïa kane ka khana samari la ju pynlong man la ka san snem bad na kane ka khana samari yn ïoh ban lum jingtip kham bniah ïa ka jingdon ki jaka rep bad ki nongrep hapoh ka District bad ka jingheh jong ka rep, ka jingai wai ïa ki jaka rep, ka rukom rep, ka jingpyndonkam ïa ka sboh bad kiwei kiwei kiba ïadei bad ka rep ka riang.
La ong ruh ba ïa ki Data ba la ïoh na ka khana samari (Agriculture Cencus) la pyndonkam ïa ki ha ka ban thaw ïa ki aiñ bad ki prokram ba thymmai kiba ïadei bad ka rep ka riang.
Kane ka khana samari jong ka 11th Agriculture Cencus, ka dei ka khana samari kaba nyngkong kaba yn pyndonkam da ki smart phone bad ki tablet ha ka ban lum bad pyndap ïa ki jingkheiñ. Ka ophis jong ka District Agriculture Officer kan lum jingkheiñ ha baroh ki shnong kiba don hapoh ka District kaba da ka jingïatreilang bad ki briew sorkar kiba na ki tnat treikam bapher bapher hapoh ka District.
