Nongpoh, Risaw 19: Kawei na ka kynhun ba la tip kum ka Umsning People’s Front (UPF) ka la shim ïa ka sienjam ba nyngkong eh ban ai rynsan ïa ki samla don sap ha ka kam ïalehkai phutbol bad ban ïalap pyrshah ïa ki jingdih ba sniew khamam ïa u drok ba la pynjot ïa bun ki samla, da kaba kan pynlong ïa ka UPF Super Cup Football Tournament ba la rai ban pynlong ha madan ïalehkai phutbol ka shnong Umran Niangbyrnai ha ka thaiñ Umsning.
Kumba la pynpaw haba kren sha ki lad pathai khubor, u General Secretary ka UPF u Bah Kitdorius Dkhar bad u Sport Secretary u Bah Sumarlang Swer, ki la pynpaw ba ka UPF ka phai khmat ban pynlong ïa kane ka tournament ka dei shi bynta ban kyntiew ïa ki samla don sap ha ka kam ïalehkai phutbol na ki kynhun ïalehkai kiba don hapoh ka Umsning Constituency.
Ki la pyntip ruh ba kane ka tournament kan sdang naduh ka 25 tarik u Risaw 2025 bad ka UPF ka angnud ba ki kynhun ïalehkai na ki shnong ba hap ha Constituency kin sa wan ban shim bynta ha kane ka tournament kaba long kawei na ka jingangnud ban ïalap halor ka jingma u drok bad ruh ban sei madan ïa ki sap jong ki khun samla.
Na ka liang ka UPF ka la pynkhreh ruh ïa ka khusnam na ka bynta ka kynhun ba jop kaba long T. 1 lak tyngka bad kaba wan baar ka dei T. 50 hajar, kaba long hi ka jingpynshlur ïa ki kynhun ban wan shim bynta ha kane ka tournament, ki la ong.
Namarkata, ki la ong ruh ba ka UPF ka kyrpad ïa baroh ki kynhun ba shim bynta ha kane ka tournament khnang ba ka thong jong ka touranemnt kan long kaba jop bad ruh na ka liang ka UPF ruh kan lah ban pyndep ïa la ka thong khamtam ha kaba ïalap pyrshah ïa ki jingdih ba sniew ba ka jingkynrei u drok ruh ka la pynjot ïa bun ki samla ba lui lui ha ka imlang ka sahlang.
Shuh shuh, ka UPF ka la rai ruh ban pynlong ïa ka Youth Soccer Camp kaba sdang ha ka 25 tarik u Risaw 2025 na ka bynta ki khynnah shynrang bad kynthei ba la dap 5 snem ka rta haduh 19 snem ka rta ba la pynbeit ban pynlong ha Gracia Futsal Turf Maryland Umsaw nongkharai. Kane ka dei ruh ka thong ban wad ïa ki samla don sap naduh ka rta kaba dang rit ha ka kam ïalehkai phutbol.
