Shillong, Risaw 20: Ka Shillong Sports Association ka la khreh ban pynshongshit shuh shuh ïa ki nongkyrshan ba ieid phutbol ha kylleng ka nongbah Shillong da ka lympung kaba thymmai, kata ka SSA Champions Cup, ka ban sakhi ïa ki kynhun ba khlaiñbor bad kiba kham tlot bor ki ban ïa aireng ban ïaknieh ïa ka burom lahduh kaba nyngkong ha Polo naduh u bnai ban wan.
Kane ka lympung kan pynïasoh lang ïa ki kynhun lahduh bad kiba wan ba ar ha ki san tylli ki kyrdan ïalehkai lane ki Division jong ka SSA bad la phiah ïa ki ha ki ar bynta (Group) kaba mar san tylli ki kynhun bad kin ïa aireng mar kylliang shisien. Ki ar kynhun kiba wan hakhmat duh na kawei pa kawei ka Group kin rung sha ka semifinal.
La khmihlynti ba kane ka lympung kan long kaba shongshit namar ba baroh ki kynhun kin ïa beh ïa ka burom kaba ïaid ryngkat bad ka nam kum ‘ka lahduh kaba nyngkong napdeng ki lahduh’ bad kumjuh ruh ïa ka khusnam pisa kaba heh haduh T.8 lak na ka bynta ka nongjop, kaba pynlong ïa ka kum kawei na ki lympung phutbol kaba heh ka khusnam pisa ha ka jylla Meghalaya hi baroh kawei.
Haduh mynta, saw na ki san tylli ki lympung phutbol ka SSA ki la dep, ha kaba ka sah satang ka First Division kaba dang ïaid shakhmat. Ka Champions Cup kan sa sdang beit beit ynda la kut ka First Division.
Tad haduh mynta ki kynhun kiba la dep pyntikna ki long (ka lahduh bad kaba wan ba-ar) ka Langsning bad ka Shillong Lajong na ka Shillong Premier League, ka Mylliem Lum bad ka Laitkyrhong na ka Second Division, ka Mawkriah West bad ka Umlyngka na ka Third Division, nangta ka Mawkasiang bad ka Mawlynrei na ka U-20 Fourth Division.
Shuh shuh, kum shi bynta ba ka jingïakhun hapdeng ki kynhun kan long kaba ïa biang bor, ka SSA ka la shah ïa ki kynhun kiba na ka Second, Third bad Fourth Division ban soi haduh san ngut ki nongïalehkai da kaba shu shim wai (loan) khnang ba ki paid nongkyrshan kin sakhi ïa ka jingïakhun kaba itynnat ha kane ka lympung.
Watla ki don ki kynhun ba khlaiñbor kum ka Langsning bad Lajong, hynrei yn nym lah ban tip mano ban rah ïa ka nam lahduh. Ki lympung kiba kum kine ki don ka bor maïan ban pynurlong ïa kaei kaei kaba pynkyndit bad kan pynkynmaw ïa ki paidbah ïa ka jingjop jong ka Wigan Athletic, ka klob kaba rit kaba la pynkhihwin ha ka phainal jong ka FA Cup pyrshah ïa ka Manchester City ha u snem 2012-13, bad kane ka lah ban urlong ruh wat ha ka SSA Champions Cup.
Ka jingthmu jong ka SSA da kaba pynlong ïa kane ka lympung kam dei tang ka jingpynbyrngia, hynrei kan ïarap ruh ïa ka Meghalaya Football Association ban ithuh ïa uno uno nongïalehkai kiba dang kiew bad dang wan na ki League kiba kham poh.
