Shillong, Naiwieng 14: Ka Seng Congress shen kan sa shim ïa ka rai ban pynshitom bad ban kyrpad ïa u Lamphang ka Ïingdorbar Thaw aiñ ka jylla u Thomas A Sangma halor ka jingkyrpad ban pynduh noh ïa ka jinglong MLA jong ki 3 ngut ki MLA jong ka seng kiba la pynïasoh noh bad ka seng National People’s Party (NPP).
Ha kaba ïadei bad kane haba kren sha ki lad pathai khubor na ka liang u nongïalam ka Congress bad u opposition chief whip u Bah Ronnie V Lyngdoh u la ong, “Kane ka kam mynta ka la don bad u Lamphang. Na ka liang jong u Lamphang un sa shim ïa ka rai jong u. Lada u Lamphang u la shim ïa ka rai na ka liang jong ngi ruh ngin sa shim ïa ki kam kiba donkam ha kaba ïadei bad kane ka bynta.”
Haba kylli na ka liang u Bah Lyngdoh u la ong, “Mynta ka shong ha ka rai jong u Lamphang. Ïa mynta ngin ym pat lah ban shim ïa kano kano ka rai tat haduh ba u Lamphang u la shim ïa ka rai jong u.”
Na ka liang u nongïalam ka Congress u la pyntip ba ka party shen kan saphah biang ïa ka jingpynkynmaw sha u Lamphang ban kyrpad ïa u ba un pynmih noh ïa ka hukum halor kane ka kam.
“Ngin sa pynkynmaw biang ïa u bad ban kyrpad ïa u ban pynmih noh ïa ka rai. Ngin ap ïa ka rai jong u ha kaba ngi ngeit ba un sa shim ïa ka bynta kiba long katkum ka aiñ bad hadien kane ngin sa lah ban shim ïa ka rai ha kaba ïadei bad kane ka kam,” u la bynrap.
Lah ban ong ba na ka liang ka Congress ka la phah ïa artylli ki jingujor kawei kaba long pyrshah ïa ki 2 ngut ki MLA ba la shah suspend kiba kynthup ïa u MLA u Bah Charles Marngar na Mawhati bad u Bah Gabriel Wahlang MLA ka Nongstoiñ bad kawei pat kaba long pyrshah ïa u Dr Celestine Lyngdoh na Umsning hadien ba ki la pynïasoh bad NPP ha ka 19 tarik u Nailar mynta u snem.
Na ka liang ka party ka la kdew ïa kiba bun ki bynta jong ki jingdkoh jong kine ki 3 ngut ki MLA jong ka Congress ha ka shithi ba ki la phah sha u Lamphang ha ka 14 tarik Nailar wat ba u wei na ki MLA um pat shim ïa ka rai ban ïasoh bad ka seng National People’s Party (NPP) naba u la shim bynta ruh ha ka jingïalang jong ka party ha ka 16 tarik jong u bnai Nailar.
Na ka liang ka Congress ka la kam ruh ba ki 2 ngut ki MLA jong ka kiba kynthup ïa u Bah Gabriel Wahlang bad u Bah Charles Marngar ki la shah pynsangeh kam hadien ba kim shym la lah ban poi sha ka jingïalang jong ka seng ha ka 16 tarik jong u bnai Nailar.
“Kine ki 2 ngut ki MLA kim lah ban pynïasoh bad kiwei ki party hynrei na ka liang u Dr Celestine Lyngdoh uba la don bad ka party tat haduh ka 16 tarik u Nailar um lah satia ban pynïasoh bad kiwei ki party. Ïa ka shithi ba ki la phah sha u Lamphang ki la kam ba ki la pynïasoh bad ka NPP ha ka 14 tarik u Nailar ha kaba kane kam don satia ïa ka nongrim kaba khlaiñ,” ong u nongïalam ka Congress u Bah Vincent H Pala.
