Shillong, Naitung, 29: Ka Sorkar Pdeng shen kan sa pyllait noh ïa ka song pisa na ka bynta ban pyntyllun ïa ka SSA ha Meghalaya, ong u Symbud Myntri Rangbah ka jylla, Bah Prestone Tynsong.
“Dang shen ngi la kynduh ïa ki ophisar jong ka Platyngka ka sorkar pdeng bad u Myntri Rangbah dalade hi u la kren bad ka Myntri ka Platyngka jong ka sorkar pdeng ban tuklar lang halor katei ka bynta namar ka kam baroh ka sahkut ha ka tnad. Ka don ruh ka jingkyrmen ba shen ka sorkar pdeng kan sa pyllait noh ïa ka song pisa kaba dei na ka bynta ka jylla Meghalaya,” u la ong.
Lah ban kdew hangne, ba ha ka 21tarik mynta u bnai, ka sorkar jylla ka la kular ban pyllait noh ïa ka 122 klur tyngka ka song pisa na ka bynta ban siew noh ïa ka tulop ba sahteng haduh saw bnai sha ki 12,541 ngut ki nonghikai SSA hadien ba ki la rai ban ïakhih da kaba thiah miet beit ha surok.
Ïa katei ka jingkular la phah ruh sha ka MSSASA da kaba pynpaw ba ka sorkar jylla kan sa pyllait noh shen ïa ka tulop ba sahkut kaba poi 44 klur tyngka.
La ong ruh ba ka sorkar jylla kan sa pyndap biang ïa ka Corpus Fund kaba 78 klur tyngka kaba yn sa pynphai hadien ba la ïoh ïa ka song pisa kaba nyngkong na ka sorkar pdeng. Shuh shuh la ong ruh ba ïa ka tulop kaba sahkut sa shibnai pat, ka sorkar kan sa siew dep ynda ki la ïoh ïa ka pisa na ka sorkar pdeng.
