Shillong, Nailur, 10: U Symbud Myntri Rangbah ka jylla u Bah Prestone Tynsong u la pyntip ba ïa ka Meghalaya House ba thymmai ha Bangalore yn sa plie paidbah noh shen.
La shim ïa kane ka rai halor ka jingdawa jong ki paidbah kiba la kyrpad ïa ka Sorkar ban shna ïa ka Meghalaya House ha sor Bengalore.
Haba jubab ïa ka Cut Motion ha ka Ïingdorbar Thawaiñ ha ka sngi Balang, u Bah Tynsong u la pyntip ruh ba un sa bishar bniah ïa ka jinglong jingman jong ki Meghalaya House kiba la don lypa bad un sa bthah ïa ki ophisar ban pynthikna ba dei ban maramot la ka long shabar ne shapoh.
Ha kaba ïadei bad ki Bill ba dang sah pongding, u Bah Tynsong u la kular ba ka Sorkar ka la shimkhia halor kane ka kam bad kan sa pynthikna ba ki Kontraktor kin sa ïoh ïa ka jingsiew manla ka lai bnai.
