Shillong, Nailar 05: U Chairman Ka Sur ka Bri u Hynñiewtrep u Bah Donboklang Kharlyngdoh ha ka sngi Thohdieng u la iathuh ba na ka liang ka sorkar jylla ka la pynpaw ba kan sa pyndep noh shen ia ka jingpynkynriah ia ka ktem sah ki pulit CRPF sha New Shillong ha kine ki sngi ban sa wan.
Haba kren bad ki lad pathai khubor hadien ba mih na ka kamra u Symbud Myntri Rangbah ka jylla u Bah Donboklang u la iathuh ba ka sorkar ka la ai ia jaka sha ki pulit CRPF na bynta ba kin ïoh tei ia ka ktem thymmai bad ban pynkynriah noh na ki saw tylli ki ktem kiba don ha ka shnong Mawlai bad ki khap jong ka. U la iathuh ruh ba kane ka jingpynkynriah ia ka ktem ki pulit CRPF ba don ha Mawlai Nongkwar, ha Mawlai jingkieng,na FCI bad na Polo.
U Bah Donboklang u la ïathuh ba ha ka jingiakynduh ba ka Sur ki Nongmawlai bad ki bor sorkar ha u snem ba la dep la ka la kular ba hapoh lai bnai kan pynkynriah noh ia ka ktem ki pulit CRPF bad u la ïathuh ba ha kane ka kynti kaba mynta kan urlong noh shen.
Kumban shu kdew hangne ba ka jingdawa ban pynkynriah ïa ka ktem ki pulit CRPF kaba don ha Mawlai ka dei hadien ba ka la don ka jingkhie waleng ki pulit CRPF kiba la tied naphang ïa ki samla jong ka shnong Mawlai Nongkwar bad wat ïa ka kali u nongthoh khubor jong u Mawphor ha ka 15 tarik Nailar 2021.
