Shillong, Nailar 28 : U Chief Public Relation Officer ka Northeast Frontier Railwayu Sabyasachi De, u pyntip ba ka thaiñ Shatei Lam Mihngi,kan sa ïoh shen ïa ka lynti rel ba nyngkong eh ka ban pynïasoh sha shilïang u pud u sam ka Ri.
Ula pyntip ba halor ka jingpyntreikam ïa ki jingtei kiba donkam na ka bynta kane ka lynti rel, ka Sorkar kala mang haduh T. 1.20 klur ban pynïasoh ïa kane ka jaka lum bad ki jaka khappud.
“Ka jingpynleit jingmut jong ngi ka long eh ha khappud ka Indïa-China. Ngi la phaikhmat sha Myanmar, ka Imphal-Moreh line ruh ka la ïoh ïa ka jingmynjur” ula ong.
Ka Sairang-Hbichhuah railway line, kaba don shathie jong ka Mizoram bad kaba ïasoh bad ka Kaladan Multimodal Project ruh ka la ïoh ïa ka jingmynjur. Ka Kokrajhar-Gelephu railway kan ïasoh bad ka Bhutan. Ha ka por kaba lyngkot, ngin sa plie noh ïa ka Agartala-Akhaura railway project.
U De ula ong ruh ba kin don shibun ki project ba ïasoh sha shilïang par hynrei ka jingpynleit jingmut jong ngi kan long eh ha kaban pynïasoh lynti rel sha baroh ki jaka khappud bad ban kyntiew ïa ka khaïi ka pateng bad ki ri kiba marjan. Ka Sairang-Hbichhuah railway project kan dei ka khyrdop jong ngi sha ka Sittwe Port ha Myanmar.
U De ula ong ba bun ki project kiba kongsan ki ban pyntrei ha ka thaiñ Shatei Lam Mihngi kin dep ki project ba pynïasoh ïa ki Nongbah jong ki Jylla ba kynthup ïa ka Sikkim, Mizoram, Manipur bad Nagaland.
“Ngi la dep pynïasoh bad baroh ki Jylla ba dang sah jong ka thaiñ Shatei Lam Mihngi. Nalor kata, ngi la don ruh ki lynti rel ba thymmai kum ka Murkongselek-Pasighat. Kane ka dei ka project ka bym ïasoh bad ka Nongbah ka Jylla hynrei hooid ka dei ka jingpynïar ïa ka lynti rel kaba ju kot ha Murkongselek, Assam bad mynta kan leit shaduh sha Pasighat ha Arunachal,” ong u CPRO.
Ula bynrap “Ngi don ïa ka jingkynshew pisa ba palat T. 1 lak klur ha kane ka snem mang tyngka ba mynta ban pyndep ïa ki project bad kane ka dei ka song pisa kaba bun bad ngi la pynleit jingmut ban pynkhlaiñ ïa ka jingïasoh lynti rel ha baroh ki Jylla ka thain Shatei Lam Mihngi”.
