Shillong, Jymmang 22: Ka jingpyni paidbah ïa ka documentary film kaba la ai kyrteng ka “Because We Did Not Choose” ba la direct da u Bah Wanphrang D. Diengdoh kan sa long ha Tura District Auditorium ha ka 24 tarik mynta u bnai.”Kane kadei ka phlim kaba pyni ïa ki khana kiba ym pat pynpaw haba ïadei bad ka indigenous labour corps na kane ka thaiñ shatei lammihngi kiba la trei bad ka British ha ka thma bah ba nyngkong. Napdeng kine kidei ki Garo Labour Corps, kiba la aiti bad kiba la shakri ha ki jaka jong ki nongwei bad kiba la khlem da la don shuh kiba kynmaw hapoh ka khana pateng. Ka pyni paidbah ka dei ruh ka jingthmu ban ïathuh ïa ki khana bad kumjuh ruh ban kyntiew ïa ki jingpynsngewthuh paidbah hapdeng ki nongshong shnong, khamtam eh ki samla,” ong u nongtrei monsngewbha u Cherian Momin ha ka kyrteng jong ka Joint NGOs Forum, Tura.
U la ong ruh ba kane ka prokram ka long ruh kum ka jingai burom ïa ka Garo Labour Corps bad ka jingjubab ruh ïa ka jingshah pynpra jong ka cenotaph ba dangshen ha Tura.
“Kane ka screening ka dei ruh kaba la ïarap bad kyrshan da ka sorkar jylla kaba la lah ban pynurlong ïa kane ka jingthmu. Ngi pynpaw ka jingai burom kaba khraw bha sha u Myntri Rangbah ka jylla bad ki tnat kiba la ai ka jingïarap halor ka jingdonkti jong ki ban pynneh pynsah bad kyntiew ïa ki kam jong ki trai ri trai muluk halor ki khana pateng jong ki.” U la kyntu ruh ïa ki paidbah, ki samla pule, ki tymmen ki san, kiba wad bniah bad ki lad pathai khubor ban shim bynta lang ha kane ka jingpyni paidbah ïa kane ka phlim. Ha kane ka prokram kan don ruh ka jingïasyllok ka ban pynbud pat sa ka jingpyni ïa ka phlim.”Ai ba ngin ïawanlang ban kynmaw bad burom bad ban ïadon bynta lang bad kine ki longïing kiba la aiti ïa la ka jong ka jingim,” ong u Momin.
