Shillong, Kyllalyngkot 27 : U Symbud Myntri Rangbah ba khmih ïa ka Tnad District Council Affairs (DCA) Bah Prestone Tynsong, ula pyntip ba ka Sorkar kan sa shim rai noh shen haba ïadei bad ka jingpynlong ïa ka elekshon MDC ha Garo Hills Autonomous District Council (GHADC).
“Kyrmen skhem, shen hi phin sa ïatip halor kane. Shisien ba ka Sorkar bad ka Kynhun Myntri kila shim rai, phin sa tip” ong u Bah Prestone haba ïakren bad ki nongthoh khubor ha ka sngi Ba-ar.
Haba pynshai ïa ki jingïa antad ba ka Sorkar kan pynjlan ïa ka elekshon, u Bah Prestone ula ong “Ka jingkylli ban pynjlan kam mih satia namar ka samoi treikam jong ka GHADC kan kut ha ka 18 tarik Iaiong. Kumta, hashuwa kane, ngi hap ban pynkhreh ïa ki jingdonkam baroh na ka bynta ka elekshon”.
Halor ka jingdawa ban pynlong ïa ka Special Intensive Revision (SIR) ha ri-lum Garo, u Bah Prestone ula ong ba kane ka hap hapoh ka jingkhmih ka Election Commission. “Lada ngi ïoh ïa ka jingpynbna, ngi hap ba pyntreikam ïa ka bad nga tharai kane ka dei ka lynti kaba sngewdei” ula bynrap.
