Nongpoh, K’lyngkot 07: Ka Ri-Bhoi Tourism and Environmental Development Forum (RBTEDF) ka la maham ïa ki paidbah ba kim dei ban pynjot bad dusmon ïaka mei mariang bad ki jingthaw ba im baroh kumba ka aïom tyrkhong ka la poi shen ba ki paidbah kila sdang ban thang khlaw.
Haba kren sha ki lad pathai khubor na ka liang u Bah Plielad Tiewsoh President ka RBTEDF u la ong ba kum ka seng kaba ju peit ïa ka bha ka miat ka mei mariang bad ban kyntiew ruh ïa ki kam jngohkai pyrthei, ka seng RBTEDF ka la buh ka jingmaham lypa sha ki paidbah shuwa ban poi ka aïom tyrkhong ba ki dei ban don ka jingkitkhlieh namar bun ki briew ki shim kabu ban thang kulmar ïa ki khlaw, ban siat pathar ïa ki mrad ki mreng bad ban pynïap dusmon ruh ïa ki dohkha dohpnat ha ki wah tang na ka bynta ka jingmyntoi shimet.
U la ong ruh ba man u snem shibun ki jingujor ki wan naduh ka jingthang dusmon ïa ki khlaw, ka jingsiat beaiñ ïa ki mrad ki mreng bad ka jingpynïap pathar ïa ki dohkha dohpnat ha ki wah da kaba wieh dawai bad kiwei kiwei ki rukom pynïap dusmon namar kane ka ktah shisha bad pynduh jait ïa ki jingthaw ba im baroh kiba u Blei u la buh la sat ha kane ka mei mariang.
“Kum ki nongshong shnong ngi dei ban don ka jingkitkhlieh ban ieid bad sumar ïa ka mariang bad ki jingthaw baroh, ba ngin ïatreilang na ka bynta ban khang pyrshah ïa ki briew kiba ju mlien ban dusmon ïa ka mariang ym ban pyrkhat tang ïalade shimet,” la ong u Bah Plielad.
Kumta u la kyrpad naduh ki shnong ki thaw, ki paidbah, ki nongïalam jong ki kynhun bapher bapher ban mih shakhmat na ka bynta ban ïada ïa ka mei mariang bad lada lap ïa kiba leh pyrshah dei ban aiti beit sha ki bor ka aiñ ban leh da kaba tyngeh.
