Shillong, Risaw 25: Ka KHADC ha ka sngi Thohdieng ka la pyntip ba shen kan sa plie noh ïa ka Ïew ha Mawsynram kaba la pyndep tei pura bad ïa kane la pyntip da u Executive Member (EM) ba khmih ïa ka tnat Council Assets u Bah Pynkhrawboklin Kharjahrin ha ka sngi kut jong ka Dorbar Tlang ka KHADC.
Na ka liang u EM ula pyntip ïa kane haba jubab ïa ka jingkylli ba la wanrah da u MDC ka Mawsynram Bah Alvin Sawkmie ha ka sngi kutnoh ka Dorbar Tlang ha ka sngi Thohdieng.
Haba jubab ïa kane u Bah Kharjahrin ula ïathuh ruh ba ïa ka Mawsynram Market Complex ka dei kaba la bei tyngka da ka District Council.
Hashuwa kane u Bah Alvin MDC ka Mawsynram u la buh ka jingkylli la ka District Council kan mang tyngka biang ne em ban pynbha shuh shuh ïa ka Market Complex namar watla ïa ka Project la dep ban trei mynta la shi snem tam hynrei haduh mynta ka Council kam pat lah ban plie ïa ka.
Halor kane u EM haba jubab ula ong, “Na ka liang u Contractor ba pyntrei ïa ka Mawsynram Market Complex um pat ai ïa ka shithi ban pynkhamti sha ka District Council ïa ka Market Complex bad na ka liang ka District Council ruh haduh mynta kam pat pynlait ïa ka pisa ba ym duna T.7 lak sha u Contractor”.
U la ong, “Haduh mynta ka Executive Committee (EC) kam pat shim ïa kano kano ka rai ban mang tyngka biang ban pynbha bad pynitynnad ïa ka Mawsynram Market Complex.”
Ha kaba ïadei bad ka pisa kaba dangsah u EM u la ïathuh ba na ka liang ka tnat ka la dep ban pynlait ïa ka file sha ka tnat Finance bad la ngeit ba kane ka kam ka la dang ïaid ban pyndep noh kloi ïa ka.
Haba ïadei pat bad ka jingkylli ba la buh da u MDC ka Mawsynram halor ka jingaiti bad ban sumar ïa kane ka iew, namar u la ïathuh ba la don mynshwa ka Market Committee haba ïadei bad kane ka ïew, u EM u la pynshai ba halor ka jingpynïaid, ban peit ne ban sumar ïa kane ka ïew kham mynshwa ki la don na ki nongïalam shnong kiba la wan ban ïakynduh ïa u bad ka Council ka dang don ha ka jingïakren da ka ktien bad kane ka kam mynta ruh ka dang ïaid.
