Nongpoh, Nailar 03: U MLA ka Nongpoh u Bah Mayral Born Syiem mynta ka sngi u la leit ban jurip ïa ka Umsaw Nongbri PHC kaba dang ïaid shaid shaid ka jingpyntrei bad ban pyndep noh ïa ka na ka bynta ka jingmyntoi jong ki paidbah katei ka thaiñ baroh kawei ha kaba ïadei bad ka koit ka khiah.
Kum ban shu pynpaw hangne ka Umsaw Nongbri PHC ka dei kaba dang shu dep ban kyntiew kyrdan na ka Umsaw Nongbri Sub-Center hadien ba katei ka jaka sumar ka la donkam shisha ban kyntiew kyrdan noh na ka bynta ban ai ka jingshakri kaba kham biang ha ka liang ka koit ka khiah sha ki paidbah katei ka thaiñ.
Ha katei ka jingjurip ïa katei ka PHC la don ryngkat da ka Dr B Lyngdoh Joint Director (MI), ka Dr NM Sangma DMHO ka Ri-Bhoi Bah R A Wanniang EE Engineering wing, u paiem S Syiem, Syiem ka Raid Nongbri, u Bah Mission Tron Rangbah Shnong ka Umsaw Nongbri, Bah Ripil Mawphniang Rangbah Shnong ka Kbet Nongbri lem bad kiwei kiwei ki riew rangbah.
Ïa katei ka Umsaw Nongbri PHC kaba la ïaid mynta kumba 85% ka jingpyntrei la mang pisa haduh 9.71 klur bad khmih lynti ruh ba shen yn sa pyndep noh ïa ka ha ka por kaba biang kumba ki paidbah ki la ap khmih lynti ban ioh ka jingshakri ba kham biang ha ka liang ka koit ka khiah bad kadei kawei ruh ka PHC kaba heh tam ha Ri-Bhoi kaba ïa ka building la tei ha ka jaka itynnad bad kylluid kaba don ruh kumba 18-unit ki quarter na ka bynta ki nongtrei.
Haba kren ha katei ka sngi na ka liang u MLA u la pynpaw ka jingsngewkmen kaba khraw ban iohi ïa ka jingïaid shaphrang jong ka kam bad khmih lynti ban ïaleh katba lah ban pyndep noh ïa ka ha ka por kaba biang na ka bynta ka jingmyntoi jong ki paidbah bad kum u MLA ryngkat ka tnad ka koit ka khiah kin sa shimkhia ruh sha ka sorkar ba dei ban pynmih noh ïa ki sanction post kiba pher bapher katkum ka jingdonkam ha katei ka jaka sumar.
Ha katei ka juh ka sngi na ka liang u MLA u la leit ruh ban ïakynduh ïa ki nongïalam shnong bad ki paidbah ka shnong Kbet Nongbri ban aiti ïa ka song pisa na ka bynta ki kam pynroi ba dang donkam ha katei ka shnong shuwa ka jingpynkhreh ïa ka jingïaseng Synod CE Union ka ban long ha u snem ban wan.
