Shillong, Naitung 01: Ka Eastern West Khasi Hills District kan ïoh ïa ka tnad treikam ba nyngkong eh naduh ba la plie ïa ka District da kaba yn plie ïa ka ophis District Transport Office (DTO) ha ka 5 tarik mynta u bnai ha Mairang.
Ka ophis DTO kadei ka tnad treikam kaba register ïa ki kali, kaba ai permit, kaba ai laisen ïa ki draibar bad kiwei kiwei de ki jingdonkam ha ki kam kali.
Ki khubor kiba la ïoh lum, ki ïathuh ba kane ka District ba thymmai duh ha ka jylla kan ïoh ïa u register number kali da ui ML15. La sngewthuh ba u register number uba nyngkong eh kata u ML15-0001 lah ban ïoh da u Bah Metbah Lyngdoh, MLA Mairang bad Speaker ka Meghalaya Legislative Assembly.
Lah ban kdew hangne ba ïa ka Eastern West Khasi Hills District kaba la pynlong da kaba shim lang ïa ki shnong kiba hap ha Mawthadraishan bad Mairang C&RD Block, la plie ha ka 10 tarik u Naiwieng ka snem 2021 da u Myntri Rangbah ka jylla, u Conrad Sangma, ryngkat ka jingïadon lang u Bah Metbah Lyngdoh, Speaker, u Bah HB Nongsiej, MLA Mawthadraishan bad Myntri ka sorkar jylla b hapdeng ka jingdon lang u paidbah byllien ha ka por ba ka sorkar kam pat pat pynjynsur ïa ki kyndon jong ka jingpang COVID 19.
Kane ka District ka kylla long ka District kaba 12 ha ka jylla bad ha shuwa ban plie ïa ka District ruh ka jingïakren kiba bun ba lang kam dei ïa ka jingïoh District thymmai, hynrei ka jingïakren kiba bun ka long halor ka kyrteng, ha kaba ki la don ruh kiba pyrshah ïa kane ka kyrteng.
