Shillong, Naitung 15 : U Nongpathai khubor jongka sorkar MDA uba dei ruh u Myntri ka tnad Tourism bad Art & Culture u bah Paul Lyngdoh u la ïathuh ba ka kynhun jong ki heh sorkar hapoh ka jingïalam u Myntri Rangbah ka jylla u Conrad K Sangma shen kin sa leit sha ka nongbah Delhi ban leit bud dien na ka bynta ban pynrung ïa ka ktien Khasi bad Garo ha ka khyrnit kaba Phra bad kumjuh ruh ïa ka mat ba la sahteng la slem bah ka Inner Line Permit (ILP).
U la ïathuh ba kine ki mat ki dei kiba la dep pass da ka Resolution hapoh ka ïing Dorbar Thawaiñ ka jylla ban kynthup ïa ka ktien Khasi bad Garo ha ka Khyrnit ba Phra jongka Riti Synshar ka ri bad kumjuh ruh ban dawa pyntreikam ïa ka ILP ha ka jylla.
“ Mynta ka kynti ha kane ka jingleit sha Delhi ngin ïa kynduh lut ïa ki Myntri ba dei ban ïa kynduh naduh u Myntri Rangbah haduh u Myntri Kam Pohïing ka ri bad kiwei kiwei ruh ban ïakren halor kine ki mat ba ïai sahteng bad ka sorkar pdeng.
Halor ka jingpynslem ban pyntreikam ïa ka ILP ha ka jylla u bah Paul u la ong ba kane ka kam ka la slem than bad ka la shu sdien ha suiñ.
“ Hooid ka tnad MHA ka dang bishar bniah ïa kane ka kam bad ka la poi ka jingïakren wat ha Parliament ruh. Hynrei mynta ka kynti kane kan long kawei na ki mat ba kongsan ba ngin bud dien ha kane ka jngleit jong ngi sha Delhi” ong u bah Paul.
