Shillong, Naitung 04 : U Myntri Rangbah ka jylla, Conrad K Sangma ha ka sngi Nyngkong u la pyntip ba shen ki dkhot jong ka Ïing Dorbar Thawaiñ ka jylla kin sa ïoh ban kren noh da ka Ktien Khasi bad Garo ha Ïing Dorbar Thawaiñ ka jylla.
“Nga la dep ban ïakren bunsien ïa kane ka bynta bad ki nongïalam kumjuh bad u Lamphang jong ka Ïing Dorbar Thawaiñ ka jylla ba la kumno kumno katto katne ki mat kum ka Motion bad Resolution kumjuh ruh ki mat ïatai halor ka jingkren u Lat dei ban ailad ha ka ktien Khasi bad ktien Garo ban kren,” ong u Myntri Rangbah haba kren bad ki lad pathai khubor.
Tangba, u ong pat ba na bynta ka jingmyntoi lang jong baroh pat donkam ban pynbiang lypa ïa ki jingpynkylla ktien, kaba mut ba watla kito ki MLA ki kren ha ka Khasi ne Garo hynrei ki hap pat ban don ka jingkren kaba la dep ban pynkylla lypa sha ka English.
“Ngi la pyrshang borbah na ka bynta bad ngi kyrmen ba ngi lah ban pynurlong noh mardor khnang ba ïa ka Ktien Khasi bad Garo yn ïoh ban kren noh ha Ïing Dorbar,” u la ong haba jubab halor ka jingkylli ba ki MLA ki la lah neem ban sdang noh ïa kane naduh ka Dorbar kaban sa long shen.
Katkum ka jingong jong u, ïa mynta hi lah ban sdang shwa tang kitei ki mat ïatai lait noh ka kynta kylli jingkylli namar katei ka bynta kadei kaba kham bun ki jnit ki jnat. Shuh shuh u ong ruh ba um pat da kwah than ban kren halor kane ka phang namar ka kam hi ka sah mynta ha ka Assembly Secretariat.
Katei ka jingkren jong u Myntri Rangbah kadei ruh halor ka jingkynnoh da ka HANM ba ka sorkar jylla kam shimkhia na ka bynta ban ïakhun ban pynrung noh ïa ka ktien Khasi bad Garo ha ka Khyrnit kaba Phra jong ka Riti Synshar jong ka Ri.
