Shen yn ïakynduh u Ksiang ka HNLC ïa u Ksiang ka Sorkar ban sdang jingkren ïasuk

0

Shillong, Lber 29 : U Nongïalam ka Hynniewtrep National Youth Front (HNYF) uba la thung da ka seng Hynniewtrep National Liberation Council (HNLC) ban long kum u Ksiang jongka u bah Sadon K Blah u la ïathuh ba shen un sa ïa kynduh noh ïa u Ksiang ka sorkar u bah Peter Dkhar IAS ba la shongthait khnang ban sdang noh ka jingkren ïasuk.
Haba pdiang sngewbha ïa kane ka jingjied bad jingshaniah jongka seng HNLC ïa u u bah Sadon u la ong “ Nga pdiang sngewbha ïa ka jingtyrwa ka seng HNLC ban thung ïa nga ban mih khmat na ka bynta ka seng ha kane ka jingkren ïasuk wat la ka long ka kam kaba khia bha ba la tynrong ha nga ruh. Ka kam jong nga ka long ban wanrah ka jingsdang ka jingkren ïasuk hapdeng ka sorkar Pdeng, Sorkar jylla bad ka seng HNLC namar ka kam ka long ban pyntip sha ka sorkar lyngba u Ksiang jongka”.
“Kumba ka sorkar pdeng bad ka sorkar jylla ki la pynpaw ïa ka jingkloi jongki ban kren ïasuk bad ka seng HNLC nga ngeit skhem ba kiei kiei baroh kin ïaid shakhmat da ka jingïasngewthuh jingmut lang tad haduh ba kut bad seisoh ka jingïakren”. ong ubah Sadon.
Haba la kylli kiei ki mat kiba ka seng HNLC ka kwah ban rah ha ka jingïakren lyngba jongu, u bah Sadon u la pynpaw ba kam long kaba bha ïa u ban ïathuh lypa ïa kiei kiei baroh namar ka jaka ka dei beit ha ka miej jingkren ïasuk. U la ïathuh ba ki don bun ki mat hynrei ka seng ka la pynpaw ba kan bat ïa ka nongrim ba ka la khlei kata ban ïa kren khlem ka jingbuh kyndon bad kan long hapoh u pud u sam jongka Riti Synshar ka ri India.
Haba la kylli hato ki la don ne em ki riew sorkar kiba la ïakren bad u, ula ïathuh da ka jingthoh te ym pat don hynrei tang da ka phone la don hi ki jingïakren. “ Na kata ka daw ngan sa ïa kynduh ia u Ksiang ka sorkar ha kine ki khyndiat sngi hakano kano ka por ba u pyllait por ban ïa kynduh ban sdang noh ka jingïakren”.
U la ïathuh ba ka seng HNLC ruh ka la ïamir jingmut bha bad u la katto katne por halor kane ka kam kren ïasuk. U la pynpaw ba kiei kiei kiba la jia hapoh ka jylla ha kine ki khyndiat por ki dei namar ka jingpynslem jongka sorkar ban khot kren ïasuk bad kaa seng HNLC hi.
“ Ka jylla ka la mad bun ki jingumsnam bad mynta ka seng HNLC ka la wan shakhmat ban kren ïasuk khlem ka jingbuh kyndon bad dei na kata ruh ka daw ba nga ruh ka kloi ban pdiang bad mynjur ïa ka jingtyrwa jongka seng HNLC” ong u bah Sadon Blah.
U la ong kaei kaba donkam mynta ka long ban sangeh ïasiat shwa na baroh arliang mamla. “ Lada ka sorkar pdeng ka la pynpaw ba ka thrang ban khot ïakren ïa ka seng HNLC, hynrei khlem ka jingsangeh ïasiat na baroh arliang mamla kata ka jingïakren ïasuk kam don jingmut satia kumta nga sngew ba donkam ban don ka jingsangeh ïasiat shwa na baroh arliang mamla”.
Haba la kylli hato yn wanrah ïa ka mat jingïakren ban weng noh ïa ka jingniew beaiñ ïa ka seng HNLC u bah Sadon ula ong kata ka shong haka jingstad jongka tnad kam pohïing jongka sorkar pdeng bad kumba nga ïohi ba ka jingñiew beaiñ kam dei kaba long junom hynrei kaba ïai pynthymmai na ka por sha ka por kumta ka shong beit ha ka sorkar pdeng bad sorkar jylla ban rai ïa kane”
Haba la kylli hato ka seng kan dawa ban map noh ïa baroh ki case ba dang sahteng pyrshah ïa ki dkhot jongka, u bah Sadon ula ong ïa kiei kiei baroh yn sa pynpaw ynda la sdang ka jingkren iasuk.

Leave A Reply

Your email address will not be published.