Nongpoh, Lber 25: Ka jingangnud ka sorkar kmie bad ka sorkar jylla ban pynshna ïing na ka bynta kito ki longïing baduk ki bym don ing don sem hapoh ka sor Nongpoh kan sa urlong noh bad kane ka la paw pyrthei ka dei hadien ba ka sorkar jylla lyngba ka tnad Urban Affairs shen kin sa ati noh ïa ki ïing baduk sha kito ki longïing kiba dei hok ban ioh ïa kane ka jingïarap na ka sorkar.
Kum ban pynkynmaw, ka sorkar jylla lyngba ka tnad Urban Affair ka la tei ïa ki ïing baduk kaba don haduh 44 unit ha ka shnong Umbuda kaba don tang kumba 1km ei ei ka jingjngai na ka sor Nongpoh bad la tei ruh ïa kane ka ing ka sem na ka bynta kito kiba ym don ing don sem kaba dei lyngba ka lad jingïarap na ka sorkar kmie ba la tip kum ka Integrated Housing and Slum Development Programme.
Ha ki snem ba la leit noh ka don ka jingduh jingkyrmen jong kito ki longïing ba dei hok ban ioh ïa katei ka ing ban shong ban sah kumba la thmu da ka sorkar kaba dei na ka jingpynsahteng u Contractor, hynrei da ka jingshim khia biang ka tnad Urban Affairs la lah ban bteng biang ban shna pyndep ïa kitei ki ïing ba shen kin sa aiti noh sha kito ki longing ba dei hok ban ioh ïa kajingïarap lyngba kane ka skhim.
Haba ioh ban ïa kren mynta ka sngi bad u Secretary ka Nongpoh Town Committee, u Bah Rayonald Kharkamni, u la ong ba shen ka sorkar ha ka jingïatrei lang naduh ka bor synshar District, ka Nongpoh Town Committee bad ka tnad urban Affairs kin sa lah ban aiti noh ïa kine ki ing sha ki 32 tylli ki longïing kaba dei ha ka wat kaba nyngkong bad kiwei pat kin sa aiti noh hadien hadien ba la pyndep pura ban shna lut ïa kitei ki 44 unit ki ing kiba la tei ha ka Shnong Umbuda.
U la ong ruh ba kane ka jingthmu ka sorkar ban aiti noh ïa kitei ki ing ki sem sha ki 32 tylli ki longïing ka dei hadien ba la mynjur (Approved) da ka sorkar jylla lyngba ka tnad urban Affair bad ha kane ka wat kaba nyngkong kin aiti shwa tang ïa ki 32 tylli ki longïing kiba la jied bad bishar bniah ba ki dei ban ioh ïa kane ka ing kumba la mang da ka sorkar.
“Kumba long haduh mynta ym pat lah ban aiti noh mardor ïa kitei ki ïing sha kitei ki longing kiba long ki nongïoh jingmyntoi, namar wat lada ka sorkar ka la dep ban mynjur ban aiti noh ïa kitei ki ing bad ki don pat ki kyndon kiba hap ban bud ba ka Nongpoh Town Committee, ka bor synshar District bad ka tnad Urban Affairs ki hap ban ïa shong pyrkhat shuwa ban aiti ïa kitei ki ïing sha kitei ki 32 tylli ki longïing” ong u Bah Rayonald Kharkamni.
Shuh shuh, u la bynrap ruh da kaba ong, ba ka Nongpoh Town Committee ka pynpaw ka jngkmen halor ka jingshim khia ka sorkar jylla lyngba ka tnad urban affairs ban pynurlong noh ïa kitei jingangnud ki nongioh jingmyntoi ban shong ban sah noh ha katei ka ing bad na ka liang ka Nongpoh town Committee ka khmih lynti ruh ba kiwei ki ïing kiba dangsah ruh shen ka sorkar kan shim khia ban pynbit pynbiang khnang ban ioh ban aiti noh sha ki longing ba dei hok ban ioh kaba long shisha ka jingmynto na ka bynta kito ki longing kiba ym pat don ing don hapoh ka Nongpoh Town, u la bynrap.
