Shillong, Naitung 28 : Ka Indian Institute of Technology (IIT) Guwahati shen kan sa phah ïa ka kaiphod kaba ïadei bad ka jingkhyllem jong u Dome jong ka Iing Dorbar Thawaiñ ka jylla kaba don ha Mawdiangdiang dang shen, ong u Symbud Myntri Rangbah ka jylla, Bah Prestone Tynsong.
La ong ruh ba mar ïa ïoh ïa ka kaiphod, mardor yn sa bishar bniah da ka High Powered Committee (HPC) ba khlieh da u Lamphang ka Iing Dorbar Thawaiñ ka jylla, Bah Metbah Lyngdoh, nangta u Myntri Rangbah ka jylla Conrad K Sangma, ki Myntri Sorkar bad ruh Nongïalam ka Liang Pyrshah kiba dei ki dkhot jong ka Committee.
“Ngin sa peit kiei ki jingkdew ba ka IIT Guwahati ka ai,” ong u Symbud Myntri Rangbah.
Kadei ha u bnai ba la dep, ba ka High Power Committee ka la thung ïa ka IIT Guwahati ba la khlieh da u Lamphang ka Iing Dorbar Thawain ka jylla ba kan long kum ka kynhun laitluid ban wad bniah halor ka jingkhyllem kynsan jong utei u Dome jong katei ka Iing Dorbar ba thymmai jong ka jylla kaba don ha Mawdiangdiang, New Shillong Township.
Dang shen, wat na ka liang ka Hynniewtrep Youth Council (HYC) ka la dawa ïa ka tohkit CBI halor ka jingkyntiew ïa ka dor nalor ka dor kaba la mang na bynta ka jingtei ïa katei ka Iing Dorbar.
