Shen ngin kiew sha ka 32 ngut ka jingdon ki MLA ha ka NPP : kob lypa u Bah Prestone

Shillong, Nailur 02 : U State President ka NPP ba dei ruh u Symbud Myntri Rangbah ka Jylla, Bah Prestone Tynsong ha ka sngi Nyngkong u la ong ba shen ka party kan sa kiew sha ka 32 ngut ka jingdon ki MLA hapoh Iing Dorbar Thawaiñ ka Jylla.
Ïa kane u Bah Prestone u la kren ha ka jingïalang rakhe ïa ka lyngkhuh dap 12 snem ka jingïaid lynti jong ka party NPP kaba long ha Soso Tham Auditorium, Shillong.
“Shen ka Election Commission jong ka Ri kan sa pynbna noh ïa ka elekshon MLA ha Gambegre. Ngi sngew tikna ba hangtei ngin jop sa kawei ka seat bad ngin poi sha ka 32 ngut ka jingdon ki MLA,”u la ong ha kane ka jingïalang kaba la wan ban shim bynta da ki nongïalam na ki block bapher bapher jong ka party.
Nalorkata, u Bah Prestone u la pynkynmaw ruh ïa ka jingïaid lynti jong ka party khamtam eh ha shwa ka elekshon MLA 2018 kaba bun ngut ki MLA ki la phet noh na kawei ka party bad wan sha ka NPP ban ïa khun ïa ka elekshon MLA.
“Ha ka elekshon 2018 ngi jop tang 19 ngut ki MLA bad ngi dei ka party kaba wan ba ar ha ka jingjop bun ngut ki MLA hadien ka Congress kaba jop haduh 22 ngut. Hynrei donbok pat ba ngi la ïoh ban thaw ïa ka sorkar kaba neh haduh kaba kut jong u snem 2023,” u la ong.
Nangta u ïathuh ruh ïa ka jingpynkhreh ïa ka elekshon MLA ha u 2023 ha kaba bun ki MLA ki la wan ban ïakhun na ka tiket NPP bad ki la jop 26 ngut ki MLA.
U la ïathuh ruh ba na ki 8 ngut na rilum Khasi Jaintia ha u 2023 tang hadien katto katne bnai lawan pynïasoh sa arngut ki MLA ka PDF kaba kiew sha ka 10 ngut bad dang shen mynta u snem pat la wan ban pynïasoh sa lai ngut ki MLA na ka Congress kaba la pynlong ïa ka jingdon ki MLA na kane ka thain ban kiew sha ka 13 ngut bad ha kajuh ka por ban kot sha u magic number 31.
U Bah Prestone u la ong ruh ba ki sngewkmen haduh katta katta ba mynta ki la ïoh ban kot sha ka jingdon haduh 31 ngut ki MLA kaba dei ka jingjop kaba khraw haduh katta katta ha ka jingïaid lynti jong ka party ban ïoh hi marwei ïa ka jingbun paidbah.