Shem jingeh ka sorkar bym ai jaka ki trai ban shna ïa ka surok Shillong – Dawki sa 10 percent

Shillong, Jylliew 24 : U Symbud Myntri Rangbah ka jylla u bah Prestone Tynsong uba dei peit ruh ïa ka tnad PWD (Roads) mynta ka Sngi Thohdieng ula ïathuh ba ka National Highways and Infrastructure Development Corporation Limited (NHIDCL) shen kan sa khot tender biang ha ki ar jaka ka pakage 1 bad pakage 5 kaba la shah iehnoh ha ki kompani kiba la sdang ban pyntrei ïa ka kam.
Ha kaba ïadei bad ka jingkynnoh ba ka sorkar kam lah ban pynïoh ïa ka jaka,u Symbud Myntri Rangbah u la ong ki don sa kumba 10 % ei ei ki bynta jongka surok kiba ki trai jaka kim pat ai jaka haduh mynta ban shna ïa ka surok Shillong -Dawki bad kane kala buh ia ka orkar ha ka jingeh. Wat la katta ruh ka jingïakren ka dang ïaid beit shakhmat.
U Symbud Myntri Rangbah u la kyntu ruh ïa kito kiba nang tang ban kynthoh bad dait ïa ka sorkar ba ki ruh kin ïarap lem ban pynbeit ïa kane ka jingeh bad ka kam kaba don hakhmat khamtam ha kaba ïadei bad ka jingiakren bad pynsngewthuh bad ki trai jaka ba kin ai ïa ki jaka jongki ban shna ïa kane ka surok Shillong- Dawki namar kan long ka jingmyntoi ïa ki hi bad ïa ki paidbah jongka jylla.
“ Ka jingeh ha kane ka jylla ka long ba ka jaka ka dei jong ki paidbah bad kumta wat la ki don ki aiñ ba ka sorkar ka lah ban leh da ka bor ruh haba ka don kam na ka bynta ki kam pynroi ïa ki paidbah hynrei lada ki trai jaka hi kim ai da ka mon sngewbha ym lah ban leh ei ei ruh em” ong u Symbud Myntri Rangbah.
“ Kumta nga kyrpad jur ïa ki trai jaka bad ïa ki riew paidbah ba kin ïatrei lang bad ka sorkar ym ban kwan myntoi shimet hynrei ban ai jaka lem na ka bynta ka jingmyntoi jong ki paidbah ka jylla hi baroh” ong biang u bah Prestone.
U la ong ba kane ka surok Shillong-Dawki ka long da shisha kaba kongsan namar ka long kum u bud lum ïa ka jylla ha ka liang ka khaïi pateng. Ki don ki trai jaka kiba haduh mynta kim kwah ban ai ïa ki jaka wat la ka Deputy Commissioner kala pyrshang ban ïakren bad ki ruh.
“Kumta kane ym tang ba ka pynslem ïaka por hynrei ka wanrah ruh ka jingeh kaba khraw” ong u bah Prestone. U ïathuh haduh mynta ki don sa kumba 10 % ei ei ki jaka bym pat ïoh na ki trai katba 90 % la dep aiti sha ka NHIDCL ban pyntrei ïa ka surok. ïa kane ka surok la bei tyngka daka Japanese International Cooperation Agency (JICA) haduh 1187.5 klur tyngka. Lada kheiñ lang pat bad ka jingsiew bai jaka kane ka projek ka la kot sha ka 1377.5 klur tyngka.