Shillong, Nailur 01: U Myntri ki kam pohïing ka jylla u Bah Lahkmen Rymbui ha ka sngi Palei u la ong ba ka sorkar ka shem jingeh ban buh ïa ki pulit pahara ban peit pyrman ïoh don ka jingtih dewiong be-aiñ ha ki jaka kiba la pajih bad kiba don sha ki shnong ba kyndong bha. Kane ka jingkren jong u ka dei halor ka jingkynnoh ba don ka jingtih dewïong beaiñ ha ki thaiñ Shallang, West Khasi Hills District.
U la ong ba kine ki jaka ki dei kiba lah jngai bad kan shim por haduh 6-7 kynta ban poi sha kine ki jaka kumta ka eh ban pynpoi ïa ki pulit.
Na ka liang u myntri u la pynpaw ïa ka jingsngew nguh ïa ki paidbah ka jylla kiba la wan ban pyntip sha ki bor ba dei khmih halor ka jingtih beaiñ ïa u dewïong sha kitei ki thaiñ.
U la ong ruh ba na ka liang ka tnad pulit kan shim khia lada ki ïoh ïa kano kano ka jingtip ba ka don ka jingtih dewiong be-aiñ la ka dei makna sha ki jaka ba kyndong eh ka jylla.
“Ki thaiñ ha South West Khasi kiba don sha ki khappud ki jynjar bha ban pynpoi pulit, hynrei watla katta ngi ïaleh katba lah”, u la ong.
