Nongpoh, Rymphang 12: U wei u mrad Bangsoh ne u Slow Loris bala tip haka ktien nongwei, hynnin ka miet haka por kumba 9 baje eiei u la leit ban rung hapoh kawei ka trok kaba dang ïeng katba u nongñiah bad nongbud katei ka trok ki dang ïeng hajan ka shnong Quinine ban leit shabar, hynrei yn da kila rung hapoh katei ka trok kila dap pat daka jinglyngngoh hadien ba ki iohi pynban ïa u mrad phylla hapoh ka trok.
Ïa utei u mrad Bangsoh la aiti pat da kitei ki nongñiah trok sha katto katne ki samla ka shnong Umsaw Nongkharai katba ki dang wan trei, bad kynduh ïakitei ki nongñiah trok kiba la ïathuh shaphang ka jingpoi utei u mrad bad mar mar u samla Tony Shylla u ba dei ruh u Secretary Shnong ka shnong Umsaw Nongkharai u la bthah ban shimti ïa utei u mrad ban rah noh sha ïing naka bynta ban aiti sha ka tnad Wildlife.
Dei mynta ka sngi ba utei u nongïalam shnong ryngkat bad katto katne ngut ki samla shnong kila leit ban aiti noh ïa utei u mrad sha ka tnad Wildlife ha Nongpoh ba kin ioh ban pynlait bad ban sumar ïa u ha ka rukom kaba dei baan pynneh pynsah ïaki jait mrad ba kin nym duhjait.
Lah ruh ban kdew hangne ba kane ka aiom kala dei ka por tyrkhong bad sdang ka jingthang khlaw bad lehse utei u mrad u wad jaka riehtngen ban mih shaduh surok ban kiew halor katei ka trok.
Na ka liang utei u samla Tony Shylla u la kyntu ïaki paidbah ba ki dei ban sumar bad pynneh pynsah ïaki mrad khlaw bad ki sim ki doh bad kiar naka jingthang khlaw dusmon ka ban pyniap pat ïa kiba bun ki jingthaw ba im hapoh ka mei mariang.
