Nongstoiñ, Jymmang 22: Kumba lai snem mynshuwa kata ha ka 15 tarik jong u bnai Nohprah 2022, ka National Federation of New State ka la pynkut ïa jingïakhih ba jai jai kaba la pynlong ha madan Jantarmantar New Delhi, kaba la leit ban ïashim bynta da ki kynhun kiba ba kynthup ïa GSMC, HSPDP, Bodo land, Gurkha land, Tripra Land, Kuki state, Budelkhand, Purbanchal hapoh ka jingïalam jong u professor Munish Tamang kum u president, ki la ïoh ban aiti ïa ka memorandum sha u Shri Amitshah Myntri kam pohïing ka ri.
Ka jingleit aiti jong ka NFNS ïa katei ka memorandum ba la ïasoi lang da ki hynñiew ngut ki nongïalam ba kynthup ïa u Professor Munsih Tamang president, Nikman Marak, Vice president Stalyn Ingti secretary, K.P.Pangñiang president HSPDP Khrishna Kanta Jamatia Vice president IPFT, Shri Khupbailu vice president Kuki State Demand Committee Khersingh Teron Chairman JACAS ka NFNS, ka la kdew shai ba ka jingdawa ïa ki jylla ba thymmai jong ka long katkum ki mat ba la kdew ha ka riti synshar ka ri.
Ha katei ka memorandum la kdew shai ruh ba katei ka jingdawa kam dei shuh kaba dang thymmai, hynrei ka dei ka jingdawa kaba la slem bha kaba la pynshong nongrim kat kum ka riti synshar ka ri. Nalor kata la pynkynmaw ruh sha ka sorkar India ba ka jingthaw ïa ki jylla ba thymmai katkum ka ktien ka thylliej bad ki jaitbynriew kiba shnong ha kitei ki jaka, kan ïarap shibun ban kyntiew bad pynkhlaiñ shuh shuh ïa ka synshar paitbah ha ka ri.
Katkum katei ka memorandum ka NFNS ka la pynkynmaw ruh ba ka sorkar India, ka la kular ruh la bunsien ba kan pynurlong ïa katei ka jingdawa bad ka NFNS ka angnud ba ka sorkar India ka dei ban pynurlong noh kloi katba lah.
Ka NFNS ka la kyrpad jur ïa ka sorkar India ba kam dei shuh ban dang pynsahteng ïa katei ka jingdawa, hynrei kan shimkhia na ka bynta ka jingbha jong ki jylla kiba la don kam ïa ka jingsynshar kaba beit kat kum ka jinglong jingman jong ka jaitbynriew.
Haba phai pat halor katei ka memorandum kaba ka NFNS ka la dep ban aiti ha u Amitshah Myntri kam pohïing jong ka ri haduh kine ki sngi ka sorkar pdeng ka dang pynsahteng khlem da ai kano kano ka jubab. Namar kata ka jingkylli ka long hato shano kane ka jingkhih dawa jylla thymmai jong ka NFNS kan poi ï.
Na ka liang u Bah K.P Panniang President ka HSPDP, u la ong ba haba phai pat ha ka jinglong jingman ha ka synshar khaddar ha baroh ki jylla ba kynthup ruh ïa ki Union Territory, ka jingbun briew bad ka jingnag jingstad ka la nang kiew shait shi shait, khamtam ha kine ki sngi ba ka sorkar pdeng ka kwah ba baroh ki jylla kin treikam lyngba kata ka Digital System, na ka bynta ba ka ri kan nang kiew shuh shuh ha baroh ki liang ka la dei ban shimkhia ïa katei ka jingdawa.
U la ong ba ka jingdawa Khasi Jaiñtia State jong ka HSPDP ka dei ka mat kaba kongsan bha, namar lada ïanujor bad ki jylla ha ka thaiñ shatei lam mihngi kum ka jylla Sikkim, Tripura ka Khasi Jaiñtia ka kham heh bun shah. Nalor kata lada phai sha ka jingbun briew ka Khasi bad Jaiñtia ki la biang bha ban don ar ngut ki MP.
Nalor nangta, haba phai shuh shuh ha ka jingpdiang jong ka NFNS ïa ka HSPDP ban ïadon bynta lang ka dei ka kabu ksiar na ka bynta ban pynurlong ïa katei ka jingdawa.
Watla katta ruh ki paitbah Khasi Jaiñtia haduh mynta kim pat shemphang satia ba ka kyrteng jong ka jaitbynriew kam shym la paw haei haei, namar ka jingmut jong ka kyrteng Meghalaya ka long (Ka ri ki lyoh) bad ka bym don mano mano ba shong ba sah ruh.
Nalor kata ka jingeh ha kaba pynrung ïa ka ktien Khasi ha ka Khyrnit kaba phra jong ka Riti synshar ka ri, ka dei namar ba haduh mynta ym pat don kata ka jylla Khasi Jaiñtia. Kumta mano ban kren ïa ka ktien Khasi haba ka jylla ka dei ka Meghalaya, ki kam ki jam kiba phah sha Delhi ka mih na ka Government of Meghalaya bad ki jingthoh jingtar ruh da ka ktien Phareng, kumta mano keiñ ba tip bad ithuh ba ka jaitbynriew Khasi Jaiñtia ka don.
