Shaïong ki Rangbah Shnong halor ka jingkwah ban shah ithuh da ki bor sorkar

Ha ka 24 tarik u Ïaïong 1993, ka sorkar India ka la pynlong aiñ ïa ka 73rd Amendment Act, 1992 ha kaba la ithuh ïa ki nongpynïaid shnong bad la wanrah ïa ki hapoh ka jaiñkup baïar jong ka Riti Synshar ka Ri India (Constitution). Ïa kane ka aiñ la khot ruh ka Panchayati Raj kaba mut ka jingsynshar ïa ki shnong. Don katto katne ki jylla kiba khlem pdiang ïa kane ka aiñ da kaba ong ba ki la don lypa ïa ka rukon pynïaid shnong kaba naduh hyndai kulong. Hynrei ka histori ki Khasi ka kdew shai ba ka kyrdan rangbah shnong ka dei kaba la pynlong doh long snam tang naduh ha ka por ba synshar ki dohlieh. Hynrei wat ha kata ka por ruh kane kam shym la trei kam bha. Ki dohlieh ki shem ba ki nongpynïaid shnong Khasi ki slem palat ban poi ha kano kano ka rai khamtam leilei ha ka ban ai jaka ban thaw ïa ki lynti ki synkien bad ki ïing sorkar, ki skul bad kolej. Namarkata ki la pynlong ïa ka kyrdan syiem kum ka kyrdan “Chieftain” (um kum ki syiem Bilat ïa kiba la khot ‘king’) lane uta uba kham hajrong ka kyrdan ban ïa ki khlieh shnong baroh lane ki ‘chiefs’. Ki Khasi kim ju don syiem uba ïaryngkat bad ki syiem kumba ngi sngewthuh ïa ka ktien King ha ka ktien phareng lane Raja ha ka ktien Hindi.
Ha ka por ba la pyntrei kam ïa ka Panchayati Raj ha u snem 1992 ter ter, ki don katto katne ki jylla kum ka jylla Meghalaya, Nagaland bad Mizoram kiba la kyntait ïa kane ka aiñ da kaba ong ba ki lah don lypa ïa ka rukom synshar shnong kaba naduh hyndai. Ki da ong ruh ba ki kwah ban wanrah ïa ka politik ha ka synshar shnong namar ïoh pait ïoh pra kata ka synshar shnong ïa kaba ïa u rangbah shnong lah shu jied da kaba ïarah kti lane shu ïapyrta sawa. Lada yn jin da la pdiang ïa ka Panchayati Raj bad khot ïa ka da ktien lajong jong ngi lehse ka jingsynshar shnong kan jin da la bha shibun eh namar ki Panchayat ki ïoh pisa ban trei ïa ki kam pynroi na ka sorkar kmie.
Lehse ha kato ka por ki don kiba sngew ba lada ki dorbar shnong ki ïoh ban pyntreikam ïa ki skim bapher bapher ha la ki shnong, ki lah ban duh bor noh ki MLA bad MDC. Dei na kata ka daw ba ka sorkar Meghalaya ha kato ka por ka la kyntait ïa ka aiñ Panchayati Raj. Mynta pat poi u pud uba ki rangbah shnong ki kwah ban ïoh ïa ka jingithuh da ka sorkar jylla. Hynrei namarba ym shym la don kano kano ka aiñ kaba kdew kumno ba ka sorkar jylla kan ai jingithuh ïa ki dorbar shnong bad halor kano ka kyndon, mynta ka don ka jingïakhaid kaba jur namar ba ki dorbar shnong ki la hap ban pyni ïa ka Permanent Account No (PAN) lane ka dulir kaba donkam ban ai da ka Income Tax Department (ka tnad sorkar kmie kaba lum khajna na ki shakri sorkar bad ki nongkhaïi baroh ki bym dei ki riewlum) khnang ba ka lah ban buddien kumno ki dorbar shnong ki kamai na ki jingkhrong shnong bad kumno ki pynlut ïa kata ka pisa. Kino kino ki senglang kiba la seng da kano kano ka jingthmu bad kiba lum pisa ha ka jingshisha ki dei ban pynshai paidbah kumno ba ki pynlut ïa kita ki pisa kiba lum. Kane ka jingdawa na ka tnat Income Tax ka la pynshaïong ïa ki dorbar shnong bad dei na kane ka daw ba ki kwah ïa ka jingithuh na ka sorkar jylla.
Kaba phylla ka long ba ïa ka Panchayati Raj Act kiba bun ki riewlum (tribal) kiba shong basah ha ki jylla heh paid kum ka Andhra Pradesh, ka Gujarat, Himachal Pradesh, Maharashtra, Madhya Pradesh, Odisha bad Rajasthan ki la pdiang kmen ïa ka Panchayati Raj namar ki ïohi ba ka don ka jingmyntoi bad kaba lah ban kyntiew ïa ka imlamg sahlang jong ki. Mangi pat shane tang namarba ka ktien Panchayati Raj ka dei ka ktien Hindi ngim ïatreh pdiang shuh. Ym shym don hi ruh ka jingïatai paidbah la ngi kwah ne em ban pdiang ïa kane ka aiñ. Lah shu rai da ka sorkar ha kato ka por; da ki katto katne ngut na ki MLA bad ruh da kiba synshar ha ka District Council ha kato ka por namar ki sngew ba lada yn pynkhambor ïa ki shnong kin ym lah shuh ban jop suk ïa ka elekshon.
Lada ngi la pdiang ïa ka Panchayati Raj ha kato ka por ngi lah lah ban ïoh syndon ïa ka State Finance Commission kaba lah ban ai jingmut kumno ban ai bor ban bat ïa ka pla pisa da ki dorbar shnong lane kita ki panchayat bad ruh ban thaw ïa ka Komiti ha man la ki distrik ki ban shna ïa ki skim bapher bapher kiba lah ban pynsuk ïa ki paidbah. Lehse ban jin da la don ki Panchayati Raj ki surok ïaid kali kin ym jin da la sniew haduh katne katne. Mynta te ngi hap ap beit kmang tang na ka sorkar jylla ban ïoh ïa ki surok, ka um bam um dih bad bun kiwei pat ki jingdonkam.
Ka jylla Arunachal Pradesh wat la ka long ka jylla jong ki riewlum (tribal) ka la pdiang ïa ka Panchayati Raj. Ka sorkar jylla ha u snem 2021 ka la pynkhamti haduh 29 tylli ki sobjek lane ki tnad treikam ïa kiba dei ban pyntrei da kita ki Panchayat katkum ka aiñ. Na ka liang ka sorkar jylla kan ai 10 na ka shispah na ka bynta ki jinglut jingsep ban pyntrei ïa ki skim. Ïa kaba tam ka jinglut kin ïoh na ka sorkar kmie.
Ka sorkar Arunachal Pradesh ka don haduh 8,151 tylli ki Panchayat lane ki dorbar shnong. Katba lah ban sngewthuh ka jingpynkhambor ïa ki Panchayat ban pyntrei ïa ki kam pynroi ha shnong ha thaw ka ïarap shibun eh ban pynsted ïa ki jingtrei bad ka kham pynduna ruh ïa ka jingshaniah than ha ka sorkar kmie. Ka Arunachal Pradesh ka dei kawei ka jylla ka bym don District Council bad kim sngew donkam hi ruh ïa kita. Ka jingpynsngew ba ki District Council ki long ki nongïada ïa ka riti ka dustur bad ïa ka khyndew ka shyiap ka la ïalam bakla ïa ngi shibun eh. Peit shuwa ha Jaiñtia Hills. Hato ym dei ka District Council kaba ai bor ïa ki kompeni shna dewbilat ban tih shi tih mawshun haduh ban da poi shaduh sha ki khlaw ba la ïada kyrpang (reserved forest) kiba dei ki tlong um jong ki paidbah ba shong ba sah shato. Ha ri Khasi ruh la shu ai mon ïa ki nongtih maw tih shyiap haduh ba la syllen lut ki khlaw. Te shaei kata ka jingïada kaba ngi khmih lynti na ka District Council? Haba kumta kaei keiñ ka jingmyntoi ban don kata ka District Council?.
Khatduh khatwai ka long kaei kaei kaba sngewphylla ba ka District Council kaba dei ban pynkhambor ïa ki shnong ïa ka kamram synshar shnong bad ruh ban kumno ba ki dei ban ai jingkheiñ ïa ki jingtrei jong ki, ka phai pynban sha ka sorkar ban ai jingithuh ïa ki dorbar shnong. Ka sorkar pat ka shaïong hi ngaiñ namar kam don ïa kum kata ka bor, lait noh lada ka Meghalaya ka pdiang ïa ka aiñ Panchayati Raj.