New Delhi, Risaw 08: Ki exit Poll ki la kylla pyrdet ha ka elekshon MLA ha Haryana bad kane ka jingkylla ka la jia tang hapdeng shi kynta mynta ka sngi.
Ki Exit Poll ha kine ki sngi shuwa ban ñiew vote, ki la pynbna ba ka Congress kan jop kput ha Haryana, ka jylla kaba la synshar da ka BJP la shiphew snem lynter. Haduh mynta ka sngi ruh kaba dei ka sngi ñiew vote kata haduh ka por 9 baje mynstep, ka Congress ka la sdang ban tamn kput ia ka BJP bad ha Headquarter jong ka All India Congress Committee, ki la sdang ban ïathang bom bula bad ïashad.
Hynrei tang shiphang, ka jingtam jong ka Congress ha ki 90 tylli ki Constituency ka la sdang ban hiar bad kat ban da dap 10 baje mynstep, ka BJP ka la tam ïa ka Congress. Shaïong ngaiñ, ki nongïalam ka Congress la kumba tied da u tyrnem, namar ki pyrkhat ba la jop beit nalor na la pynpaw ki Exit Poll bad kumjuh ruh ka jingtam ha ka por ba sdang ñiew. Kat haduh ba ai ïa kane ka khubor, ka BJP kan ïoh synshar marwei namar ha ka ïingdorbar kaba don 90 ngut ki MLA, ka BJP ka donkam ban ïoh palat 45 ngut ban ïoh synshar hi. Hynrei ka la ïoh 48 ngut, katba ka Congress pat ka la jop tang 37 ngut.
Hynrei ka Congress ka la ïoh pynhiar mynsiem khyndiat da ka jingjop ha Jammu and Kashmir, ha kaba ka jingïatreilang bad ka National Conference, ka la Congress ka la jop 49 Seat na ki 90 tylli ki Assembly Seat ha kane ka Jylla rit ne ka Union Territory.
Kane kadei ka sien kaba nyngkong ba ka Jammu and Kashmir kan ïoh ban pynlong elekshon hadien ba la pynduh noh ïa ka Article 370 bad ban pylla noh ïa ka kum ka Union Territory.
