Shillong, Nailar 19 : Ka Meghalaya Cycle Association (MCA), ka la pynkhreh shaid shaid na ka bynta ban ïoh sei madan ïa ki khun samla ka jylla ban mihkhmat sha ka lympung ïalehkai jong ka National Games kaban sa long ha kane ka jylla ha u snem 2027.
Haba ïadei bad kane, ha ka 15 bad ka 16 tarik jong ka taiew kaba la dep, ka MCA ka la lah ban pynlong ïa ka MTB Cross Country, ïa kaba la pynlong ha kut jong ka shlem pule ka skulbah NEHU, kaba la long ha ka 15 bad ka 16 tarik mynta u bnai.
Ka synjuk ka pyntip ba ha 02 tarik u bnai Risaw mynta u snem kan pynlong sa ïa ka jingpyrshang kaba ïadei bad ka jingïakob jong ka Road Race, ha kaba ka jingpyrshang ka long na ka bynta ki samla kynthei bad shynrang ha ka rta kaba 17-25 snem bad yn bynrap lang bad ka jingpyrshang (trial) naka bynta ka road bike.
Haba ïadei bad kane, la ïoh ruh ïa ki jingkren na u Bah Lening Bareh ba long u President ryngkat ka jingdon lang ka jong u Jazcinth Lywait General Secretary bad u Mikhim Sangma Coach.
Na ka liang jong ki, ki khot ki wer ïa baroh ki samla ha ka rta 17 haduh 25 snem la ka long naduh kiba ju niah cycle lane ki nongïalehkai phutbol, ki nong mareh marathon bad kiwei kiwei ki ba kin wan pyrshang da kaba kular ba na ka liang ka Association kan sa peit lut ïa ka jingdonkam jong ki.
