Nongpoh, Jylliew 02: Ha kawei ka jingjia aksiden, kawei ka scooter kaba don ïa u number ML 05 C 2331 bala ñiah da u Thymmai Bor Rapsang naka shnong Lapalang kala shah tynrah nadien ha kawei pat ka Scooty NTORQ rong stem kaba don ïa u number ML 05 AE 2887 bala ñiah da u Jerry Shylla na Umsning ryngkat bad uwei pat u paralok ba shong hadien, hynrei utei u paralok u la phet krad ïalade hadien katei ka jingjia.
Katkum ka jingtip bala ioh lum naki pulit la ong ba kane ka jingjia kala jia hynnin ka sngi u Blei haka por 5 baje eiei janmiet ha khrum ka jingkieng Flyover ha lad Umroi bad baroh ar ngut ki nongñiah ka scooter bad scooty kila mynsaw jur ha katei ka jingjia.
Shuh shuh, ka tyllong khubor na ki pulit, ka iathuh ruh ba tang hadien katei ka jingjia aksiden, ki paralok ki la rah bad pynkynriah noh ia katei ka Scooter na ka jaka ba la jia ka jingjia aksiden, shwa ban poi ki pulit.
Ïa kitei ki 2 ngut ba mynsaw la pynkit noh sah Nongpoh Civil Hospital bad ka jingtohkit halor katei ka jingjia ka dang ïaid shakhmat.
Ha kawei pat ka jingjia aksiden, kawei ka bike Pulsar kaba don ïa u number DL 9S AG 9555 bala ñiah da u Synroplang Lyngdoh na Umsaw ryngkat bad uwei pat u paralok bala tip kyrteng kum u Arjenspring Mawrie na Umsawkhwan, kiba dang thmu ban leit sha Lad Umsaw kila mynsaw hadien ba ka thuk thuk kaba ki shong kala syntuid bad bret ïaki sha shilliang surok.
Ha katei ka jingjia u paralok ba shong hadien u la kham mynsaw jur haki bynta jong ka khlieh bad la pynkit noh mar mar sha Civil Hospital Shillong ban ioh ka jingsumar ba paka.
