Shillong, K’ Lyngkot 14: Ka khubor ba la ïoh na ki pulit la ïathuh ba u Gorind Prasad u la phah ka jingujor ba ha ka 9 tarik mynta u bnai, ki runar bym lah ban ithuh ki la tuh ïa ka thuk thuk jong u kaba don u nombar ML-05AD-1010 napoh New Kench’s Trace, Laban, Shillong. Hynrei ha ka 10 tarik mynta u bnai, ïa katei ka thuk thuk kaba la shah tuh la lap lyngba ka GPS ba la pyndait hapoh ka thuk thuk napoh ka shnong Saparijala, Tripura.
Ha kawei pat ka jingjia ki pulit ki la ïathuh ba u Bah Vicky Lynshing u la phah ka jingujor ba hapdeng ka 9 bad 10 tarik mynta u bnai, ki runar bym lah ban ithuh ki la tuh ïa ka scooter jong u kaba don u nombar ML-05AE-2088 napoh ka ïingsah kaba ha Laitkor, Shillong.
Shuh shuh ki pulit ki la ïathuh ba u Bah Richard Japang u la phah ka jingujor ba ha ka miet jong ka 10 tarik mynta u bnai, ki runar bym lah ban ithuh ki la tuh ïa ka thuk thuk jong u kaba don u nombar AS-01-1182 napoh Ïewduh, Shillong.
Ha kawei pat ka jingjia ha ka janmiet jong ka 10 tarik mynta u bnai, ki runar bym lah ban ithuh ki la shoh ïa u Bah Lester Kharumnuid ba la 40 snem ka rta uba na ka shnong Umlynhong, Smit (EKH). Halor kane ka jingjia u tei u lanot u la mynsaw malu mala bad la pynkitnoh sha Civil Hospital Shillong.
Shuh shuh ki pulit ki la ïathuh ba u Bah Baniaiphira L Marbañiang u la ujor ba ha ka 9 tarik mynta u bnai ha ka por kumba 1.15 baje mynstep, ki runar bym lah ban ithuh ki la tuh haduh 6,156 kilo u rynsun, uba la pynkit napoh ka shnong Mawpun Kyrdem sha Guwahati ha kawei ka kali kaba don u nombar AS-01PC-1867.
Shuh shuh ki pulit ki la ïathuh ba uwei u rangbah uba dei u nongshong shnong jong ka South West Garo Hills u la phah ka jingujor ba ha ka 4 bad 6 tarik mynta u bnai, u la ïohpdiang ka jingshah phone kaba bun sien ha kaba utei uba phone u la dawa pisa kumba T. 2 lak na u.
