Shillong, Risaw 31: Ka khubor ba la ïoh na ki pulit la ïathuh ba u Bah Daniel Thangkhiew u la phah ka jingujor ba ha ka 28 tarik mynta u bnai, ki runar bym lah ban ithuh ki la tuh ïa ka thuk thuk jong u kaba don u nombar ML-05X-0561, kaba la pynïeng harud surok ha Barik, Shillong.
Ha kawei pat ka jingjia ki pulit ki la ïathuh ba kawei ka longkmie kaba sah ha Shillong ka la phah ka jingujor ba ha ka 24 tarik jong u Nailur, 2024, ki runar bym lah ban ithuh ki la thok ïa ka pisa kumba T. 88,370/-, da ka jingkular ba kan ïohnong khambun katba ka dang plie ïa la ka jong ka ‘Instagram account’.
Shuh shuh na ka liang ki pulit ki la ïathuh ba u nongshong shnong jong ka South West Khasi Hills u la phah ka jingujor ba ha ka 21 tarik mynta u bnai ha ka por kumba 11.40 baje mynstep uwei u briew ba la ithuh kyrteng kum u ‘Bahdeng’ u la kit ïa artylli ki masi hapoh ka kali jong u ha Lad Nongkrem, Shillong, da ka jingleh mynleh ba un thied ïa kine ki jingri ha ka dor T. 1.02 lak, hynrei u la phet krad pynban na katei ka jaka khlem da la siew ïa katei ka pisa.
Ha kawei pat ka jingjia ki pulit ki la ïathuh ba uwei u nongshong shnong ka Shillong u la phah ka jingujor ba ha ka 18 tarik mynta u bnai, ki runar bym lah ban ithuh ki la shaiñ ne hacked ïa ka office email ID jong u bad halor kane na ka liang ki pulit ki dang pynlong ïa ka jingtohkit bad thwet jur ïa ki runar kiba donkti ban leh ïa kane ka kam.
