Shillong, Nohprah 19: Ka khubor ba la ïoh na ki pulit la ïathuh ba ka Grejita Momin ka la phah ka jingujor ba ha ka miet jong ka 14 tarik mynta u bnai ki runar bym lah ban ithuh ki la tuh ïa ka scooter jong ka kaba don u nombar ML-05P-3592 napoh ka 1st MLP Bn., Mawïong, Shillong.
Ha kawei pat ka jingjia u Coy Commander, 110 Bn., BSF, BOP Ryngku (EKH) u la phah ka jingujor ba ha ka 15 tarik mynta u bnai ha ka por 3 janmied, ki shipai BSF ki la ïohi ïa ka jingrung jingmih jong ki runar bym lah ban ithuh kiba don kumba 3 haduh 4 ngut bad hadien ba ki la ïohi ïa ki BSF kitei ki runar ki la phet krat na kane ka jaka. Kham hadien ha ka por ba ki BSF ki dang pynlong ïa ka jingtalasi ki la lap ba ka la don ka jingrung tuh shapoh u pud u sam ka India na khappud najan ka BP No. 1226/10-T kaba dei ruh hapdeng ka picket No. 53 bad 54 bad ki shipai ki la lap ïa 2 tylli ki byrni ba la thep ïa u kwai.
Ha kawei pat ka jingjia, u Bah Wonderful Mawlong uba dei u nongbud kawei ka bus u la phah ka jingujor ba ha ka 14 tarik mynta u bnai ha ka por 9.15 baje mynmiet ki runar bym lah ban ithuh ki la shoh ïa u ha ka por ba u dang pan ïa ka bai shong bus na ki. Ha kane ka jingjia utei u nongbud bus u la mynsaw ha kaba la pynkitnoh mardor sha Civil Hospital Shillong ban ïoh ki lad ai jingsumar.
