Shillong, Nailar 08: Ka khubor ba la ïoh na ki pulit la ïathuh ba u Debojit Dey u la phah ka jingujor ba ha ka 3 tarik mynta u bnai, ki runar bym lah ban ithuh ki la prong hapoh ka ïing jong u kaba ha Jail Road, Shillong bad ki la tuh ia ka ksiar bad kiwei kiwei ki tiar.
Ha kawei pat ka jingjia ki pulit ki la ïathuh ba ka Mikeade Kharnongbak kaba na shnong Mawpat Circle-2, Shillong, Proprietor ka Sumer-Z Caterer ka la phah ka jingujor ba uwei uba la kynnoh da ka kyrteng Lalambha Makri u khlem pynphai shuh ïa ka gas burner kaba u la shim wai napoh ka dukan jong ka ha ka 1 tarik mynta u bnai bad u khlem siew ruh ïa ka bai shim wai kaba la kot T. 16,520/- hajar.
Shuh shuh na ka liang ki pulit ki la ïathuh ba u Bah Wanskhemmlang K Shilot u la phah ka jingujor ba ha ka 24 tarik u Naitung, u la shem ba ki runar bym lah ban ithuh ki la tuh ïa 3 tylli ki RRU kiba shongdor kumba T. 4.5 lak napoh ka shnong Laitkyrhong (EKH).
Ha kawei pat ka jingjia ki pulit ki la ïathuh ba u Amit Paul u la phah ka jingujor ba ha ka 23 tarik u bnai Jylliew, 2024, uwei ba kyrteng u Anup Mallick u la shim kylliang ïa ka kali Maruti Swift kaba don ka nombar ML-05AC-9543 ban leit sha Guwahati, Assam hynrei u khlem da la wan pynphai shuh wat hadien ba la pynkynmaw la bun sien. Kham hadien utei uba ujor u la shem ba utei u Anup Mallick u la die ïa ka kali jong u sha Manipur.
