Shillong, Nailar 10: Kawei ka longkmie kaba sah ha nongbah Shillong, ka la phah ka jingujor ba ha ka 13 tarik u Naitung, ka la ai ki jingtip kiba bniah ha kawei ka Instagram video page ‘Jessica Lynne Witty’ na ka bynta ban phah ïa ka pisa da kaba kular ban ïoh ka pisa kaba khambun bad halor kane ka la thep ïa ka pisa kumba T. 47,428/-. Kham hadien pat kane ka longkmie ka la sngewthuh ba ka la shah thok.
Ha kawei pat ka jingjia uwei u nongshong shnong ka West Khasi Hills u la phah ka jingujor ba ha ka 18 tarik mynta u bnai, u la ïohpdiang ïa ka jingshah phone da ka Google verification code bad ïohpdiang ruh ki khubor ha kaba kane ka la paw ha ka mobile phone jong u, ha kaba la pyntip ba la bynrap ïa arngut kiba ïoh jingmyntoi hapoh ka Bank account jong u kaba ha HDFC, Nongstoiñ Branch (WKH). Hynrei ha ka janmiet jong ka 23 tarik mynta u bnai u la shem ba ka pisa kumba T. 8.1 lak la shah sei tuh napoh ka Bank account.
Ha kawei pat ka jingjia kawei ka longkmie kaba sah ha Shillong ka la phah ka jingujor ba ha ka 24 tarik u Jylliew, ka la shem ba ka pisa kumba T. 1,85,652/- la dep ban shah sei tuh napoh ka Bank account jong ka.
