Shillong, Nailur 07: U President ka Meghalaya Government Lower Primary School Contractual teachers’ Association(MGLPSCTA) u Babu Birbor Riangtem ha ka sngi Balang u la sdang ïa ka jingshah thngan ba khlem buh por ha lynti ïaid kjat kaba don ha pyrshah ka Secretariat ban dawa na ka sorkar ba ka dei ban thung kam biang ïa ki nonghikai contract kiba ka sorkar ka weng noh ïa ki na ka kam ha u snem 2021.
Haba kren bad ki nongthoh khubor u Babu Birbor u la ong ba kane ka jingshah thngan ba khlem buh sngi jong u ka dei namar ki shkor jong ka sorkar kim ïohsngew ïa ka jingdawa ba shong nia jong ki ba um ban se bvan shim da ka sien jam ban pynong da ka jingshah thngan haduh ban da ïoh ïa kaei kaba ki nonghikai contract ki dawa ne haduh ba un da dkut mynsiem syndon.
U la ong ruh ba kane ka jingshah thngan jong u ka dei na bynta ki bun bun hajar ngut ki nonghikai contract kiba shah behkam kiba don hapdeng ka jingkordit kaba khraw namar ka jingbeh kam noh ka sorkar ïa ki.
“Ki don ki nonghikai kiba mut ban pynïap noh ïa lade namar kim don jingkyrmen shuh ïa ka lawei jong ki, don ruh kiba shu ïam bad don ruh kiba khie ïoh pang namar ka jingshah beh kam, dei na bynta kine keiñ ba nga wan ban shong shash thngan hangne” u la ong.
Haba la kylli lada ka sorkar ka khot ban ïakren un weng ne bteng beit ïa kane ka jingïakhih u Babu Birbor u la ong, ‘Lai pawa ka jingim jong nga ka la leit satang shi pawa kaba dang sah, lada ka khot ïakren khlem pynurlong ïa ka jingdawa ngan bteng beit ban shah thngan haduh da dkut mynsiem ha kane ka jingïaleh”.
U Babu Birbor u la ong ruh ba kiwei kiwei ki jylla ki apynlong da ki Teachers Eligibility Test na bynta ki nonghikaikiba hikai contract bad ïa kito kiba la pass ka sorkar ka pynrung syndon kum ki nongtrei jong ka bad ïa kito kiba ym lah pat ka bteng ban ailad ba kin hikai kum ki nonghikai contract.
“Ngi la san ka rta bad ha ka kam ngi la don palat ïa ka 10 snem ban phah kheh kot biang ïa ngi bad ban ïakop bad kiba dang samla ngim kotbor shuh bad dei na kane ka daw ba ngi donkam ïa ka TET kaba kyrpang” u la ong.
Haba ïadei bad ka jingwan shim bynta tang lai ngut na ki bun bun hajar sha kane ka jingshong shah tngan u ong ba namar ka bor synshar District ka pynjari da ka 144 Cr.PC ba u shong tang khyndiat ngut bad u la ong ruh namar kiba bun ki nonghikai kim don pisa shuh namar ki la shong khlem kam khlem jam la bun bun sngi bun bnai hynrei u ong ba kin don ki katto katne kiban wan shim bynta mynta ka sngi ha kane ka jingshah thngan jong u.
