Shillong, Ïaiong 25: U President ka Meghalaya Pradesh Congress Committee (MPCC) bad MP ka Shillong ma Vincent H Pala hynne ka sngi nyngkong ula ther tyngeh ïa ka Sorkar Meghalaya Democratic Alliance (MDA) namar ka jing bym don ki Nongïalam kiba lah ban weng ïa ka jingeh jong ka sor Jowai haba ïadei bad ka kam theh ñiut.
“Ka don ka jingbym biang ha ka jinglong Nongïalam bad ka lah ban don ruh ka kam bamsap harieh namar kim lah satia ban ithuh ïa ka jaka ban pynlong jaka theh ñiut” ong u ma Vincent haba ïakren bad ki nongthoh khubor.
Kat kum ka jingong jong u, ka long kaba sngewsih ban ïohi ba ka Sor Jowai kaba dei ka jaka pdeng ka khaii ka pateng jong ka District, ba ka hap ban ïaid lyngba kane ka jingeh.
Halor ka jingbym ai jaka jong ki briew ban pynlong jaka theh ñiut, une u Nongïalam ka Congress ula ong ba kane ka dei ak dak ba ki paidbah kila pyrshang ban ialeh pyrshah ïa ka Sorkar Jylla.
“Ki (Sorkar)la pyrshang ban rah ïa baroh kine ki jingeh ka sor Jowai sha kiwei pat ki jaka la ka dei ha Elaka Sutnga, lane ha Amlarem. Namar kata, nga sngew ba kam don satia ka jingshaniah jong u paidbah ïa ka Sorkar. Kane ka dei ka dak ba ki paidbah kila sdang ban ialeh pyrshah ïa ka Sorkar” ula bynrap.
Hynrei ula ong pat ba ka dei ka kamram jong ka Sorkar khamtam u Myntri ka Tnad Urban Affairs ma Sniawbhalang Dhar bad u MLA ka Jowai ma Wailadmiki Shylla lem bad ki bor District ba kin leh eiei mardor halor kane ka jingeh ki paidbah ka sor Jowai.
Haba kylli, u ma Vincent ula ong ba ka long kaba suk bha ban weng ïa kane ka jingeh haba ai jingmut ïa ka jing donkam ban pyndonkam ïa ki kor ki bor ka juk nalor ban ithuh ïa ka jaka bad ban iatreilang bad ki trai shnong jong ka thaiñ.
“Ha Ri-lum Garo kin sa buh ïa ki kor ka juk, balei ym leh lang ha Jowai. Ki don shibun jait ki kor ki bor kiba lah ban pynkylla ïa ki ñiut sha ka bording, pynkylla sha u rnga bad kiwei kiwei” ula ong haba bynrap ‘Lada kam don jing eh eiei ha Shillong, ym don jingeh ha kiwei kiwei pat ki bynta jong ka Jylla, balei ba mih jingeh tang ha Jowai” ula ong.
