Shillong, Lber 25: Bun tylli bri kwai kiba don ha ki thaiñ Ichamati bad Saikarap, Shella, ki la shah thang dusmon ha kine ki sngi kiba ladep.
Katkum ka jingïathuh ki trai bri, la ong ba kane ka jingthang ka la jia naduh kine ki sngi kiba ladep, ha kaba ka rukom thang ka pyni ba kadei ka jingleh dusmon da ki katto katne ngut ki riew runar kiba ka jingthmu jong ki, ka long ban kurup syndon ïa kitei ki bri, kiba don ha ki jaka ba madan.
Ha kane ka jingthang dusmon kiba bun ki dieng kwai kiba dang rit bad kiba dang khie ki la ing khong lut bad wanrah ka jingduhnong kaba khraw ïa ki paidbah ba rep kwai.
Ym shym la ïoh ïa ka daw ba thikna balei ba la thang dusmon kumne, hynrei ki trai bri ki suba ba ka lah ban dei namar ba ki don ki briew kiba kwah ban die thied ïa kine ki bri kwai ban pynkylla kum ki par mawshun. Hynrei na ka liang ka shnong bad ki Sengbhalang ki pyrshah jur ïa kane, khamtam ban eh ban die bad ban ai leh benami ha ki briew kiba na shabar jylla.
La suba ba don kiba kynshoit ban thang dusmon kumne, khnang ban pyntieng ïa ki trai bri bad ban leh kput ruh ïa kito kibym treh ban die. Kine kidei ki bri kidei ki jaka rep kwai kiba la slem bha jonbg ki trai ri trai muluk na katei ka thaiñ khappud bad ka Bangladesh bad ki la long ki pliang ja la bun bun snem ïa ki briew katei ka thaiñ. Kiba bun ki kmie ki kpa ki la bsa khun bad buh skul khun ruh lyngba ka kam rep bad khaïi kwai. La antad ba kane ka jingshah thang dusmon ki kwai kiba dang sara bad kiba la sdang ban jrong lai ne saw phut, ka la wanrah ka jingduhnong kaba da ki lak tyngka ïa ki trai bri.
