Shah tangon ki nongshong shnong ka Moojem ha ki Pulit Assam, leit ujor ki seng ha u DC

Jowai, Nailar 12: San ngut ki nongshong shnong jong ka shnong Moojem, West Jaiñtia Hills District ki la mynsaw hadien ba ki la shah shoh shah bom ha ki Pulit Assam hadien ki la shah kem ha ka por 11:00 baje mynmiet ha ka sngi Palei.
Katkum ka jingtip ba la ïoh lum la ïathuh ba kine ki nongshong shnong jong ka shnong Moojem ki la shah khang kdong ha ki Pulit Assam katba ki dang thmu ban leit shaw ïa uwei u rawon jong ka shnong uba slem ban poi sha shnong haduh ka por mynmiet.
La ïathuh ba kane ka jingshah shoh jong kine ki nongshong shnong ha ki Pulit Assam ki don hadun san ngut katkum ka shithi jingujor kiba kynthup ïa u Manki Sungoh, u Augustin Shylla, u Kordon Sungoh, u Binelson Raksaw bad uwei u khynnah skul uba dang 16 snem ka rta bad uba dang pule ha ka klas IX ha kawei na ki skul ha Jrikyndeng.
Katkum kane ka jingjia, la ïathuh ba ki Pulit Assam kiba buh ktem ha Jrikyndeng ki bat nyngkong ïa u Manki Sungoh, ïa u Augustin Shylla bad ïa u khynnah skul ba dang 16 snem kiba dang thmu ban leit phai noh sha la ïing hynrei ynda la poi ha ka bynta khappud ka shnong Moojem bad Jrikyndeng ha ka jaka ba ki khot ka Mookhim kyndit kynsan ki Pulit Assam ki la pynsangeh ïa ka kali jong ki bad ki la shoh la bom ïa ki da ki tdong suloi kat haduh ba ki la mynsaw jur.
Ki nongshong shnong jong ka shnong Moojem kiba la ïoh jingtip halor kane ka jingjia mar mar ki la leit sha Jrikyndeng ba don ka Police Station jong ki Pulit Assam ban ujor halor ka jingshah shoh jong kine ki lai ngut. Ki Pulit Assam kim shym la sngap satia ïa ka jingujor hynrei ki la hukum pynban ïa kine kiba wan ujor ban leit phai noh sha la ïing bad hangne ruh sa ar ngut ki nongshong shnong kiba kynthup ïa u Kordon Sungoh bad u Binelson Raksaw ki la shah bat ha ki Pulit Assam bad shah bom haduh ban da mynsaw.
Ha kaba ïadei bad kane ka jingjia, ki kynhun seng kiba kynthup ïa Ka Sur u Paidbah ka Bri u Hynñiewtrep’, ka Saiñdur Tipkur-tipkha Ïeng Ehrngiew Hynñiewtrep (STIEH), ka Hynñiewtrep Border Disputed Redressal Forum (HBDRF), ka Jaiñtia Youth Federation (JYF) bad ka Jaiñtia Student Union (JSU), ha ka sngi Thohdieng ki la leit ujor ha u Deputy Commissioner jong ka West Jaiñtia Hills District u Bah Garod L.S.N. Dykes.
Kine ki kynhun seng ki la dawa ïa u Deputy Commissioner ba u dei b an shimkhia mardor halor kane ka jingjia da kaba ujor mar mar sha ki bor ka aiñ jong ka Jylla Assam bad ban pynshitom ïa ki Pulit kiba donkti bad shoh dusmon ïa kine ki briew.
Ha ka jingïakren bad ki lad pathai khubor, ki nongïalam shnong jong ka shnong Moojem kiba kynthup naduh u Waheh Shnong u Ma Hopingson Raksaw bad u Secretary u Ma Nilanki Sten ki la pynpaw ka jingsngewdiaw haba don kum kine ki jingjia kiba ju jia na ka por sha ka por ïa la ki paradoh parasnam ha ki jaka khappud.
Ki la ïathuh ruh, dang ha kine ki sngi ba ladep, ka la don kawei ka jingshah kem jong uwei u nongshong shnong tang na ka daw ba u leit pom dieng na khlaw ban ïoh shna ïing.
Kum ki nongshong shnong kiba shong ba sah ha ki jaka khappud ki buh ka jingkylli, ba balei kane ka jingshah shoh jong ki nongshnong shnong ha ki Pulit ka Assam ka ju ïai jia manla ka por bad na kaei ka daw ba ki Pulit Assam kim kheiñ briew shuh bad ki shu leh donbor katba ki mon ïa ki paradoh parasnam, la ong kine ki nongïalam jong ka shnong Moojem.