Shah sospon u SI bad 4 ngut ki Pulit Langrut halor ka jingshah bom pynmynsaw u samla hapoh Sohra PS

Shillong, Naitung 9 : Uwei u Sub-Inspector bad sawngut ki Pulit Langrut (UB Constable) ki la shah sospon na ka kam hadien ba la lap na ka jingtohkit ba ki donkti ban shoh bad bom pynmynsaw ïa u samla lud u Getwin Jyrwa hapoh Sohra Police Station ha ka 3 tarik mynta u bnai.
Kat kum ka jingpyllait khubor na u SP ka East Khasi Hills u Bah Vivek Syiem, u la ïathuh ha ka 1 tarik Naitung 2025 u Rangbah Shnong ka Mawkisyiem u la ai ka jingujor ejahar (FIR) pyrshah ïa u Getwin Jyrwa uba na Mawkisyiem.Kat kum katei ka jingujor la ïathuh ba ha ka 28 tarik Jylliew 2025 u Getwin Jyrwa u la shoh ïa uwei u samla ha Mawap, Mawkisyiem bad u la kren ruh da ki kyntien khor bad kiba khlem akor bad byrngem ïa une u samla ba u shoh bad ïa ka ïing ka sem jongu.
Nalor kata hakhmat ki briew kiba bun u la sei ïa u tiar jinglong shynrang jongu bad byrngem byrsit da ki ktien sih ktien sang kaba la pynlehraiñ lut ïa ki riew paidbah. Halor kane ka Dorbar Shnong Mawkisyiem ka la khot hajir ïa u arsien lynter hynrei u khlem leit mih satia kumta u Rangbah Shnong u la ujor noh da ka FIR. Halor kane ka ejahar ki pulit ka Sohra Police Station ki la rejister case no 09/2025 Sections 131/133/296(a) of the Bharatiya Nyaya Sanhita (BNS) pyrshah ia u Getwin.
Ha ka 2 tarik Naitung 2025 ha ka por 9 baje mynmiet ki pulit ki la ïoh jingtip ba u Getwin u don ha ïing kumta ki pulit na ka Sohra PS ki la leit da ka jingthmu ban ïoh kem ïa u, hynrei u Getwin u la ïoh ban phet noh shwa ba ki pulit kin poi ha ka ïing jongu. Ha ka 3 tarik Naitung 2025 ha ka por kumba 11 baje ei ei, ka kmie jogu ka kong Mildred Jyrwa ka la wan ïalam ïa u sha Sohra Police Station. La pyntip ïa ka ba ki pulit kin sa pyllait noh ïa u ha ka por janmiet. Hadien kane la ïalam ïa u Getwin da ki pulit sha Sohra CHC ban eksamin ïa u da ki doktor bad haba la dep la wan ïalam biang ïa u sha Police Station. Hadien kata ha ka por 8.15 Pm i la wan i kmie jongu sha Police Station bad la pyllait ïa u da ka jamin.
Ha ka 7 tarik Naitung 2025 la ïoh pdiang ïa ka jingujor na ka Kong Mildred Jyrwa kaba la kynnoh ba u khun jongka u la mynsaw baroh shirynïeng ka met ha ka por ba u shah set ha Sohra Police Station. Ka la ïathuh hadien ba ka la shimti ïa u na Police Station ka la leit ïalam ïa u sha Sohra CHC ban eksamin ïa u bad nangtei ki la phah ban pynkit beit ïa u sha Shillong Civil Hospital. Ka la kynnoh ba kine ki jingmong ha ka met jongu ka dei na ka jingshah bom shah shoh ha ki pulit.
Kumta mar mar la thung ïa ka jingtohkit ba la khlieh da u Sub- Divisional Police Officer (SDPO) ka Pynursla u bah B. Wanswett MPS. Hadien ka jingtohkit jongu bad hadien ba u la aiti ïa ka kaiphod jingtohkit ha ka 9 tarik Naitung 2025 la sospon \ïa utei uwei u Sub Inspector (SI) bad saw ngut ki Pulit Constable jongka Sohra Police Station. Ka Departmental Proceeding ruh ka dang ïaid shakhmat pyrshah ïa ki. Nalor kane la rejister ruh da ka criminal case pyrshah ïa ki ha Sohra PS kat kum ka Case No 10/2025 U/S 120(1)/3(5) BNS bad ka jingtohkit ka dang ïaid da uwei u Inspector na kiwei pat ki Police Station khnang ban pynthikna ba kan ym don kano kano ka jingleh shilliang khmat.
Ka tnad pulit ka ïeng ban pynshai ba ka thong treikam ka long ban bat pyrkhing ïa ki kyndon aiñ bad ban pynthikna ba ka don ka jinglehhok na ki briew jongka la ka long ha kano kano ka kyrdan ruh. Kumta lada don kino kino kiba ïaid lait ïa ka aiñ yn pynshitom ïa ki kat kum ka aiñ namar ym don uwei ruh uba lah ban pyndonkam ïa ka bor jongu palat ïa ki bor ka aiñ, pynkut ka kyrwoh na u SP.