Shah shukor ki paidbah Nongstoiñ, kit lut ïa ki tiar ka MCH Hospital sha Mawkyrwat

Nongstoiñ, Jymmang 29: Ka long kaei kaei kaba la pynkyndit haduh katta katta ïa ki ba bun ba lang jong ka sor Nongstoiñ, ban tip ba ïa ki tiar ki tar bad kiwei kiwei ki jingdonkam kiba la mang na ka bynta ka Hospital jong ki longkmie bad ar met bad Hospital sumar khunlung (Maternity and Child Hospital) kaba don ha Nongstoiñ, la sei noh bad rah noh sha kiwei ki District. Ki tyllong khubor ki ong ba la rah noh ïa ki tiar sha Civil Hospital ha Mawkyrwat jong ka South West Khasi Hills District.
Lah ban pynkynmaw hangne ba ïa ka MCH Hospital Nongstoiñ, la lah ban pyndep ïa ka building la kumba katto katne snem bad na ka liang ki riew paidbah bad wat ki sengbhalang bapher bapher, ki la ju ïai pynkhih ïa kane ka mat ba ka sorkar ka dei ban pynbiang noh sa ki nongsumar sukher, ki tiar ki tar kiba biang ban ïarap ïa ki longkmie ba armet bad ki khunlung. Ym tang katta ki la ju ïai ap khmih lynti ruh ban plie paidbah noh ïa ka na ka bynta ka jingmyntoi jong kiba bun.
Ha u Naiwieng jong u snem 2022 na ka liang ka tnad ka koit ka khiah jong ka sorkar ka la mynjur ban thied ïa ki tiar ki tar ha kane ka Hospital. Hynrei, ka long kaba sngewsih ban tip ba dang ha ka 23 tarik u Jymmang 2023, ar tylli ki trok ki la wan ban ieng ha phyllaw jong katei ka Hospital bad ban kit noh ruh ïa ki tiar ki tar ai jingsumar ha katei ka Hospital sha Civil Hospital Mawkyrwat.
Na ka liang ka seng KSU hapoh ka jingïalam jong u samla Franklin Syiemiong General Secretary, ka la leit jurip ïa kane ka Hospital ha ka sngi nyngkong bad lap ïa ka jingshisha ba la pynkit noh ïa ki tiar na kane ka Hospital shawei pat.
Na ka liang u Bah Franklin Syiemiong u la ong ba ka seng ka la ïakynduh bad u DMHO ban kylli bad ka jubab ka long kaba shai ba la rah noh shawei. Kumta u la ong ba na ka liang ka seng ka pynpaw ka jingpyrshah kaba jur halor kane. U la ong ba kane ka dei ka jingleh shilliang bad jingñiew beiñ ïa ki paidbah ka District baroh kawei.
U la ong ba na ka liang ka seng kam lah ban pdiang ïa kane namar ïa ka bhah jong ka Nongstoiñ, la shu wan knieh noh bad rah shawei. Ka seng ka artatien jur ruh ïa kane ka sorkar ba kan pynurlong ïa ki jingdonkam ha kane ka Hospital, namar baroh shikatta la ïai ap ban plie noh pynban mynta lei wat ïa ki tiar ki tar kiba la mang kyrpang bad kiba don hangne ruh ka tuh noh.
Kumjuh ruh na ka liang ki President rangbah jong ka seng WKSU, UHM, MYF, WYF bad HANM, ki la leit ban jurip ha kane ka juh ka sngi bad lap ba katei ka MCH Hospital ka long kaba thylli bad ym don tiar ei ei.
U Bah D.Sun President ka seng WKSU u la pynpaw ba ha ka jingshisha ka West Khasi Hills ka la donkam palat ïa kane ka Hospital. Ha ka jingshisha u la ong ba na ka liang ki paidbah bad ki sengbhalang bapher bapher ki la kyntur ïa kane ka kam naduh u snem 2013. Baroh shikatta la ïai ap ba kan urlong noh bad la kyrmen ruh da kiba bun ban sa plie noh shen namar ïa ka building la dep la kumba katto katne snem.
Hynrei, kyndit khlem poi pyrkhat ka sorkar ka shu knieh kynthet noh ïa ka bhah kaba dei hok hangne. Kane ka rukom leh u ong ka dei ka jing pyrshang ban pharia lane phiah noh ïa ka bhah jong ki paidbah Nongstoiñ. Ha ka jingshisha ka long ka jingkyrkhu bad jingkyrmen khamtam ïa ki longkmie bad khunlung, pynban mynta long da khongpong. U la ong ruh ba ka sorkar kam dei ban ïalehkai politik bad ka koit ka khiah jong ki paidbah ka West Khasi Hills.
Na ka liang u Bah Will Sohshang President HANM u la buh jingkylli ïa ka Minster jong ka tnad ka koit ka khiah ba halor kiei ki nongrim ba la rah noh ïa ki tiar nangne sha Mawkyrwat. U la ba ka long kaba shisha ba ka South West ruh ka donkam ïa ki tiar ki tar jingsumar kiba biang. Hynrei, ka sorkar ka la dei ban sanction thymmai lada donkam. Tangba ïa kaba la sanction ha West Khasi Hills ym dei ban rah shawei.
U la ong kan don jingmut aiu ban shu tei kat kane ka building hynrei ym long pyndonkam bad ym don tiar ei ei. Kaba tieng ka long ïoh kan sa shu long pynban ka ktem awria hadien habud kumba la ju jia ruh ïa ki building sah shrah jong ka sorkar ha Nongstoiñ.
“Kane ka kam ka dei beit ka buit poh politik hi ban khanglad ïa ki kam pynroi, tang namar ba ngim kyrshan ïa uno uno u kyrtong u ba ki mon ngi lah ban ong. Hynrei ngi kren shai pat ba wat ïalehkai politik ïa ka koit ka khiah jong ki paidbah ka West Khasi Hills, namar kane ka lah long kum ka politik hi”, u la ong.
Ki nongïalam jong ki san seng ki la buh por ruh shitaiew ïa ka sorkar lyngba ka Health Department ba kan pynshai halor kane ka jingjia. Hadien ka shi taiew lada ka sorkar kan shu sngap mynthi, ki san sengbhalang kin sa shim ïa ka rai kumno ban leh da kaba yn rai ruh ryngkat ka sur jong ki paidbah nong West.