Shillong, Lber, 25: U Vice President ka North Eastern Hill University Students Union (NEHUSU) u samla Estherson Sohtun u la shah ktah kti bad shah shoh ha ka Lah Sngi u Blei ha ki briew ki bym dei ki trai jylla kiba lehkmen Holi hajan ka pung kaba don ha phyllaw jong ka skulbah NEHU, Shillong. Mar mar hadien kane ka jingjia, u Vice President ka NEHUSU u la ujor da ka ejahar sha ki Pulit jong ka Mawkynroh Out Post ba kin pynlong ïa ka jingtohkit kaba bniah halor kane bad ba kin kem ïa kiba donkti.
Ha ka jingïakren bad ki lad pathai khubor hadien ba la dep leh ïa ka Medical Check-up ha Civil Hospital, Shillong une u nongïalam ka NEHUSU u la ïathuh ba kane ka la jia ha ka por 12:30 baje mynsngi.
U la ïathuh ba ha ka jingïashoh, u la mong na ki bynta ki kti bad ka met bad nalor kata wat ka sopti phong jong u ruh ka la kad.
“Nga sah beit ha (Hostel) NEHU bad nga dei ruh u Vice President ka NEHUSU. Dang step tang shu khie u telephone u nonghikai bad leit ai khublei Holi ïa u. Tang dep nangta nga wan nga ïohi ba don hajan ka pung ha NEHU ba don ka jingleh kmen bad ba wah ïa ka Banner lehkmen Holi. Ngim don jingujor eiei ïa ka jinglehniam Holi jongno re jongno, ka ri India dei ka ri ba ai laitluid ïa ka jingmane Blei, ki bun ki jaitbynriew lane ki niam ki bapher bapher bad ki jinglehniam jongno jongno ngim ju pyrshah,” ong u samla Sohtun.
“Hynrei haba ngi leit peit hangto hajan pung ngi ïohi ba don katto katne ki bym dei ki khynnah pule ha NEHU khamtam ki don katto katne ngut kiba dei ki nongïalam jong ka Akhil Bharatiya Vidyarthi Parishad (ABVP). Ngi khlem leit da ka bor bad ngi khot da ki Security incharge ba kin leit ïakren ban ym leh politik ha NEHU lyngba kine ki jinglehkmen,” u la ong.
“Katba ngi dang leit ïakren, u ong pynban ba ki Khasi ki pyrshah ïa ka Holi, ki kwah ban shna ishu ha ka jingïapher jaitbynriew hapdeng ki Khasi bad kiba na Rithor bad don kiba ring video ban pynheh ïa kane ka ishu nga knieh ïa ka mobile phone jong u khynnah. Hadien ba nga knieh ïa ka mobile phone ki thombor ïa nga,” la ïathuh u samla Sohtun bad ong da kaba ïathuh shuh shuh ba ka la mih ruh ka jingïapyni bor hapdeng jong u bad ki nongïalam ka ABVP na NEHU.
“ïa kiba pule ha NEHU ngim don kano kano ka jingujor bad baroh ki lah ban rakhe ïa kano kano ka jinglehniam hynrei ki briew hi kiba wan nabar ban leh politik ha NEHU ngim ailad daleilei. Ngi khlem leit ban pynsangeh ïoh ka jia ka jingkulmar,” ula ong.
“Ban ïashad ïa lehkmen ngim don jingujor hynrei ban leh trai da ki briew kiba nabar hapoh kane ka ri ka muluk jong ngi ngin ym ailad,” u la ong bad bynrap, “ngim pyrshah ïa kano kano ka seminar na ka NEHUSU hynrei kumba la leit ha kato ka sngi da ki nongïalam ka HYC ki pyrshah ïa ka jingwan jong ka RSS.
Haba kylli u la ïathuh ruh u la jer kyrteng ha ka ejahar ïa ki briew kiba donkti ban ktah kti ïa u.
