Guwahati, Naitung 01: Ka khubor ka ïathuh ba na ka jingïaleit peitkai kshaid jong kawei ka Longïing, ka la poi pynban sha ka jingsngewsih ha kaba haduh 7 ngut ki briew kila shah rong ha ka jingpoi umsaw kynsan kynsan ha kane ka kshaid namar ka jingther u slap.
Kane ka jingjia ka la jia ha ka janmiet sngi U Blei ha Mumbai ha ka wah kaba don marjan ka Bhushi Dam ha Lonavala, kaba jngai kumba 80 km na Mumbai.
Ka khubor ka ïathuh ba kine ki shi ïing shi sem kiba na Liyaqat Ansari bad Yunus Khan na Hadapsar, Pune, kila leitkai sha kane ka jaka bam khana bad la ki jong ki bahaïing hasem.
Hynrei, namar ka jingpoi umsaw kynsan kynsan ha ka wah, haduh 7 ngut ki briew kila sahkut ha u maw ba don hapdeng ka wah. Ka Umsaw kaba la nang kiew katba nang slap, ka la rong ïa kine I briew hynrei arngut ki la jngi bad la ïoh ban pyllait im ïa ki.
Ka video ba la ïoh ring ka pyni ba baroh kine ki briew ki la ïeng halor uwei u maw hapdeng jong ka kshaid bad ki la ïapiam para briew ban lait ka shah rong. Hynrei tang hapoh ka shi minit, ka bor jong ka umsaw ka la rong lut ïa baroh hapdeng ka jingpyrta briew ban ïarap.
Haduh mynta, ki bor Sorkar ki dang ïoh tam tang lai tylli ki metïap bad kine ki dei kiba la tip kyrteng da u Sahista Liyaqat Ansari (36), Amima Adil Ansari (13), bad Umesh Adil Ansari (8).
Ki arngut kiba dang jah, ki kyrteng u Adnan Sabahat Ansari ba 4 snem bad Mariya Akil Saiyyad ba 9 snem.
Ki don da ki spah ngut ki nongshangkai pynngad hajan kane ka wah kiba la sakhi ïa kane ka jingjia hynrei ym shym la don mano mano ba lah ban ïarap ïa kane ka Longïing.
