Shillong, Nailur 12 : Ka Meghalaya Regulation of Gaming (Repealing) Bill 2022 ba la wanrah da u MLA ka KHNAM na ka North Shillong Constituency u bah Adelbert Nongrum ka la shah rem ha ka jingïatynjuhbor ba ka da sur hapoh ka ïing dorbar thawaiñ ka jylla mynta ka sngi.
Ka Liang Synshar ka la jop da ka jingbun paid ha ka jingïatynjuh bor sur bad kumta ym shym la shah ban wanrah ïa kane ka Bill hapoh ka ïing dorbar bad la kyntait noh mardor ïa ka da u Lamphang ka ïing dorbar u bah Metbah Lyngdoh.
Haba u bah Adelbert u la pynpaw ka jingsngew pyrshah halor kane ka rai u bah Metbah u la ong “ Nga la shim ïaka sur jongka ïing dorbar bad na kata ka daw ym lah ban pdiang ïa ka bad la hap ban kyntait noh mardor.
U la ai jingmut pat ia u MLA ba u lah ban wanrah ïa kane ka mat da kiwei pat ki lad ym shuh kum ka Bill.
Haba wanrah ïa kane ka bill u bah Adelbert u la ong ïa kane ka Bill la wanrah ban pynpaw ka jingsngew mynjur bad kawei kaba ki paidbah jongka jylla ki sngew pyrshah halor ka jingthmu jongka sorkar ban ithuh ia ki kam ïakhalai ha ka jylla.
U la ong ba donkam ban bishar ïa ka jingthmu jongka sorkar ban kyntiew ïa ka khajna ha ka jylla ban plie ïa kata ka casino wat hapdeng ka jingpyrshah jur na baroh ki liang.
