Shillong, Naitung 31 : Ki la don bun ngut bha kiba la shah rai pynrem ha ki kam runar bapher bapher tang ha East Jaintia Hills District.
Kine ki kynthup naduh ki kam aksiden kali, ki jingktah kti bad kiwei kiwei.
Ïa kine ki mukotduma la tohkit da ki pulit jong ka thain hi bad bishar pat ha ka kashari jong Chief Judicial Magistrate kaba ha Khliehriat.
Na kine, u Bah Morning War u la shah rai pynrem na ka jingthmu ban ksih ïa u khun ba dang lai snem bad ruh namar ka jingbyrngem ïa ka kurim jong u. Une u runar u la hap ban siew ïa ka kuna kaba 500 tyngka na ka bynta ka kam runar hapoh ka kyndon 352 IPC bad 1000 tyngka pat na bynta ka kam runar hapoh ka kyndon 323 IPC.
U Bun Phawa pat u la shah rai pynrem namar ki kam runar jong u ba kynthup ïa ka jingktah kti bad byrngem ïa ka kurim kaba khlem sah lang. Halor kane u la shah rai pynrem ban shah set patok ryngkat ka jingpynshitom kaba jur haduh lai sien nalor ka kuna kaba 30,000 tyngka na bynta ka kam runar hapoh ka kyndon 498A IPC, san snem ka jingshah set patok ryngkat ka jingpynshitom kaba jur bad ka kuna ba 20,000 tyngka na bynta ka kam runar hapoh ka kyndon 506 IPC bad shisnem ka jingshah set patok ryngkat ka jingpynshitom kaba jur na bynta ka kam runar hapoh ka kyndon 323 IPC.
U Jrewel Pale pat u la shah rai pynrem na bynta ka aksiden kali kaba jur kaba la jia ha ka 26tarik Lber, 2020. Un ngat ban shah set patok na bynta 6 bnai ryngkat ka jingpynshitom hapoh ka kyndon 279 IPC bad shisnem ka jingshah set patok ryngkat ka jingpynshitom hapoh ka kyndon 304A IPC.
U Bikash Das pat u la shah rai pynrem na bynta ka aksiden kali kaba jur kaba la jia ha u Ïaiong 2019. Un shah set patok na bynta 6 bnai ryngkat ka jingpynshitom na bynta hapoh ka kyndon 279 IPC bad arsnem ka jingshah set ryngkat ka jingpynshitom katkum ka kyndon 304A IPC.
U Sanki Lamurong u la shah rai pynrem na bynta ka jingktah kti ïa u Neini Bareh. U la hap ban siew ïa ka kuna kaba 400 tyngka katkum ka kyndon 352 IPC bad 900 tyngka katkum ka kyndon 323 IPC.
